Shillong, Nailur 29: Kum ka dak jingpynpulom noh ïa ka jingthmu ban khaïi ïa ki jingdih pynbuiad, ki pulit ka East Agartala da ka jingïatreilang bad ka College Tilla police outpost ki la ïoh ban kurup noh ïa u marijuana (Ganja) uba shongdor kumba T. 75 lak uba la thmu ban kit sha jylla Meghalaya.
Hadien ka jingïoh jingtip kaba thikna, ki pulit ki la ïoh ban khangkdong ïa kawei ka trok kaba 12 shaka bad ha ka por ba ki la talasi ki la lap ïa kawei ka synduk kaba don shibun bha u kynja (marijuana) bad hadien kane na ka liang ki pulit ki la kurup noh ïa utei u jingdih pynbuiad.
“Ngi la ïohpdiang ka jingpyntip kaba thikna shaphang ka jingdon utei u jingdih pynbuiad uba la thmu ban khaiï beaiñ hapoh kane ka trok. Mar mar ki pulit ki la leit kloi bad ki la pynïeng ïa kane ka trok hapoh ka police checkpoint. Watla haba peit i kumba kane ka trok ka dei kaba thylli, hynrei ka la don pat kawei ka jaka kaba la shna kyrpang hapoh kane ka kali tang ban kit ïa kine ki tiar kiba beaiñ. Da ka jingïarap u mechanic, ïa katei ka kamra kaba la buhrieh la lah ban plied, bad la lap haduh 45 synduk u ganja uba khia 355 kilogram uba shongdor kumba T. 75 lak,” ong ki pulit.
Ïa utei u nongñiah katei ka trok la ithuh kyrteng da u Mithun Karmakar ba la 33 snem bad na ka liang ki pulit ruh ki la kem noh ïa u. Ha ka jingtohkit kaba nyngkong, u Karmakar u la pynpaw ba ïa une u ganja la phah ïa u ban kit sha jylla Meghalaya.
