Shillong Nailur 29: U Nongaiktien ka BJP u Bah M. Kharkhrang ula ong ba ka thma pyrshah drok kadei hi ban sdang na la ïing bad dei namar kane donkam ban ai jinghikai (Awareness) ïa ki kmie ki kpa khnang ba kin tip, kumno ban ithuh ïa ki dak ki shin, lada ki khun kila sdang ban ngop ha u drok.
U la ong ba da kaba ai prokram pynsngewthuh ïa ki Kmie Kpa yn sa lah ban pynduna ïa ka kam dih drok.
“Dei tang ka jingai awareness ïa ki kmie ki kpa kaba donkam bha namar u drok um shym la wan kynsan ne wan hi. Lada u khynnah u ïoh 80 ne 90% ha ki por exam bad u hiar kynsan ka jingïoh percentage kamut kadon kaei kaei kaba bakla lah dei ban sngewthuh na kane ruh bad ki kmie kidei ban wad ïa ka daw kaei kaba u ne ka khynnah ki la leh,” u la ong da kaba bynrap ba kam long kaba suk ruh ïa ka HYC ban leit ai awareness sha baroh ki skul hynrei dei ka sorkar ban ai awareness ïa ki kmie ki kpa ha ki skul khamtam ki kmie ki kpa jong ki Klass ba 8 haduh kaba 10.
U la ong ruh ba namar ka supreme court ka ri India ka ai ka lad ba kiba die bad kiba dih drok ki lah ban shim bail hadien ba la shah kem ka la nang ailad ïa ki ban ïoh bail bad ban leh kham sniew shuh ïa ki kam khaïi bad dih drok.
“Na ka liang ki shnong pat kaei kaba lah ban leh ka long ba tang shu ïoh jingtip ba ki don ki ïing kiba don kiba dih drok dei ban leit pynsngew thuh ïa ki kmie ki kpa ba kim dei ban leit pan bail kloi namarba kan khambha ba ki sah shwa ha patok namar lada ki la mih kloi shabar kin nang kham sniew shuh shuh bad kumjuh ruh ïa kiba die, kum ïa kato ka briew kaba la shah kem lah bunsien na paltan bazar kaba dei ruh ka Syiem ban khaïi drok wat ha ki thaiñ Polo bad dei na kane ba lada kito kiba khaïi drok ynda ki la shah kem tang hadien shibnai yn da ki la mih na patok ki die arshah na kaba ki ju die mynshwa,” ong u Bah Kharkrang uba dei ruh kum u SP barim ka East Khasi Hills.
Nangta u la ong ba ka Forensic Science Laboratory kam don ka bor ne ban leh eiei haba phai ïa ki NDPS case bad kumjuh ka jingbym don ki lawyer hapoh ka aiñ ba ka long kaba eh ruh ïa ka Court ban bishar ïa kiba la shah kem.
“Lada thep ïa kito kiba la shah kem bunsien hapoh ka PIT-NDPS lehse kan kham shem jingeh ba kin ïoh biang kloi shabar kat bym pat ka jingtian bishar ki pulit,” u la pynkut.
