Jowai, Nailur, 28: Ka tnat ka koit ka khiah jong ka West Jaiñtia Hills, ha ryngkat ka jingïatreilang bad ka Veterinary ki la rakhe ïa ka World Rabies Week 2024, ha Nangbah LP School, Nangbah, West Jaiñtia Hills, halor ka phang, “Breaking Rabies Boundaries”.
Ka Dr. D Hinge ka la batai ïa ka jingdonkam ban pynlong kum kine ki program khnang ban ïarap pynsngewthuh halor ka jingma na ki jingri mrad kiba don ka jingpang bad ban donkam shibun ban ai tika ban lait na kane ka jingma.
Ka Dr. M Syngkon ka ïathuh shaphang ka jingsdang ka kam injek bad ka jingma jong ka jingpang rabies bad ka jingdonkam ruh ban ai injek ïa ki jingri bad kumjuh ruh ïa ki briew.
Na ka liang ka Dr. E Chen Officer jong ka A.H& Vet, Nangbah, West Jaiñtia Hills kala kyntu ba ka injek ïa ki jingri mrad ka long ka lad jingïada ïa ki briew na ka bynta ban lait na ka jingpang rabies lada ki ksew ki dait, la ban jur ruh ban pynduh jait ïa ka jingpang dait ksew (rabies).
U DMHO ka West Jaiñtia Hills u Dr. K. Dhar ula ai jingïaroh halor ka jingpynlong ïa kane ka phang ban ïasyllok lang na ki kynhun bapher bapher jong ka tnat ka Koit ka Khiah bad ka jingtreilang jong ka shnong ka thaw bad ki khynnah skul kiba la ïashim bynta ha ki jingkular ban kyrshan ïa ka jingpynduh jait ïa ka jingpang rabies bad kumjuh ïa kiwei kiwei jingpang.
