Nongstoiñ, Nailur 29: Ka rukom treikam jong ka Meghalaya Energy Corporation Limited ha kaba ïadei bad ka jingshim ïa ka bai thang bording, ka la buh ïa ki paidbah ha ka jingeh kaba khraw khamtam eh ïa ki paidbah ha ki nongkyndong.
Ha kaba ïadei bad katei ka phang ki paidbah nong pyndonkam bording ha ki bun tylli ki shnong kyndong, haba ïakren bad u nongthoh khubor, ki la ong ba ka jingeh kaba ki ïakynduh ka long, ka jingphah ïa ki bill ynda la bun bnai ha kaba ka bai thang bording ka la bun kat haduh ba ki don ki longïing kiba lada kim leit siew ruh ka pisa ka la nang bun. Kumta ki hap ban ïaleh katba lah ban pynbiang ha ka ban leit siew ïa katei ka bai bor ding.
Don na ki longïing kiba ong ba na ka daw jong ka jinghiar ka kamai kajih bad ka jingkyrduh bylla, hynrei ka jingbun jong ka bai bording sa ka bai rung skul, ka bai kot bad kiwei kiwei ki jinglut, ki la shem jingeh haduh katta katta ban pyndap haïing hasem.
Nangta ki don ruh ki longïing ha ki shnong bapher bapher jong ka West Khasi Hills, kiba la pynpaw ka jinglyngngoh halor ka jingkiew kynsan ka bai lait ha kine ki khyndiat bnai ba la lah. Don na ki longïing kiba la ong ba ka bai thang bording ka poi 100 tyngka lane 150 tyngka shi bnai. Hynrei hadien ar lai bnai ei ei ka bai lait ka kiew kynsan haduh 500 tam shi bnai.
Ka jingkylli ka long balei ka kiew kynsan kumne haba ka rukom pyndonkam bording ka long kumjuh. Don ruh kiba ïathuh ba ha ba leit kylli na ophis, ka jubab ka long ba ki shna bill katkum ka meter reading. Halor kane, don kiba la pyrshang ban bujli noh ïa ka meter ïoh ba sniew kynsan ka meter.
Hynrei, ha u bnai ba poi bill biang ruh ka long hi kumjuh khlem jingkylla, lut ei kaba leit thied meter thymmai. Hato kaei kane naei ka mih kane ka jingkiew kynsan ka bai thang lait. Ka sorkar bad u myntri ba dei peit ki dei ban jubab khnang ba ki paidbah kin shai.
Ki paidbah ka West Khasi Hills ki la dawa ruh ïa ka tnad bording ba ka dei ban pynkylla noh ïa ka rukom treikam, da kaba phah noh ïa ki bill shisien shi bnai khnang ba ki paidbah kin kham sting ka jingsiew. Ha kajuh ka por ki la ong ba ha kine ki snem ka jingthut jong ka bording ka jur bha namar ka load sheding, katba ka bai thang bording pat ka kiew ar shah ban ïa kiwei pat ki snem.
Ki la ong ruh ba ha ki snem ba la dep, ka sorkar ka la thung da ka Komiti ba kyrpang kaba la tip kum ka Public Account Committee, na ka bynta ba kan peit bad khmih bniah ha kaba ïadei bad ka jingpynbiang ïa ka bor ding hapoh ka jylla, la ka long ha sor ne ha ki nongkyndong ka treikam bha.
Hynrei ha kine ki snem ym ju ïoh sngew shuh la katei ka Komiti ka dang treikam ne em. Kumta na ka bynta ka jingmyntoi jong ki paidbah ha baroh kawei ka jylla, ka sorkar ka la dei ban pynim biang ïa katei ka Committee.
