Nongpoh, Nailur 23: Ki nongïalam ka HNYF, Northern Region mynta ka sngi kila mih shakhmat ban pynshai ba kum ka seng kala weng noh ïaka jinglong dkhot u Bah Marcus Marten u ba bat ruh kum u Vice President ka HNYF Central Body bad naduh mynta um dei shuh u dkhot ka seng HNYF.
Haba kren sha ki lad pathai khubor naka liang u Bah Alfred Malai General Secretary ka seng HNYF haka jingdonlang u Bah Heasting Lyngdoh President bad ki dkhot u la ong ba kum ka seng kala dep pynskhem pura ïaki nongkitkam ba thymmai jong ka HNYF Northern Region haka 14 tarik mynta u bnai bad hadien katei ka jingpynskhem naka liang ki nongïalam jong ka CEC kila shong ruh da ka jingïalang haka 21 tarik mynta u bnai bad ai bor ïaki nongïalam jong ka HNYF Northern Region ban pynbna paidbah ba u Bah Marcus Marten ba dei ruh u President barim ka HNYF Northern Region bad u Vice President ka HNYF sengkmie um don bynta shuh bad ka seng bad um dei shuh u nongïalam ne u dkhot ka seng HNYF naduh mynta ka sngi hadien ba ka seng kala lap shibun ki kam ba u la ïaid lait ïaki kyndon ka seng, watla ki nongïalam kim shym la pynpaw satia.
Shuh shuh naka liang u Bah Alfred u la kyntu ruh ïaki para dkhot bad ki paidbah kiba don bynta bad u Bah Marcus Marten ba kim dei shuh ban shim ïa u kum u dkhot ne nongïalam jong ka seng HNYF bad um don jingïadei shuh bad ka seng HNYF bad lada don kano kano ka kam, ki lah ban ïakynduh ïaki nongïalam kiba la pynskhem thymmai, u la bynrap.
