Shillong, Nailur 22: Ka St. Anthony’s College, Shillong, ka la pynlong ïa ka Graduation Day Ceremony ban pynpaw ïa ka jingburom bad rakhe ruh ïa ka jinglehkmen halor ka jingjop jong ki samla pule Graduate jong ka snem 2024 ha kaba 6 ngut na ki samla pule ki la ïoh ha ka kyrdan PhD bad kumba 132 Rank ha ki kyrdan pule bapher bapher. Ïa kane ka prokram la wan ban long kongsan da u Swapnil Tembe, IAS, Additional Secretary, Education Department, bad Director of School Education and Literacy, ka sorkar jylla. Na ka liang u Tembe ha ka jingkren jong u ula ïaroh ïa ka jinglah kane ka jaka pule kaba la wanrah ïa ki samla pule ha ki kyrdan bapher bapher.
Shuh shuh u Swapnil Tembe, IAS, u la ai khublei ïa ki samla pule halor kane ka jinglah jong ki ban poi sha kane ka kyrdan ka ban wanrah ka jingkylla ha ka jingim jong ki. Haba phai sha ki jingïoh mad jong u hapoh ka IIT Kharagpur, u la ïathuh shaphang ka jingdonkam ban tip sa ïa kawei ka sienjam kaba la ktah bha ïa u hadien ka jingpyndep ïa ka graduation.
U Tembe u la ïasam ruh ïa ki kam jong u kiba u la leh haduh ban da poi sha ka kyrdan IAS ha kine ki 10 snem ba la leit.
Ha kane ka prokram la jied ïa u Skhemboklang Lyting, kum u valedictorian napdeng ki graduate jong u snem 2024.
La ong ruh ba u Skhembok lang u la pynïasoh ïalade bad ka Evening College kaba la pynïaid da ka Almuni Association jong ka college kaba ki la ai ki jinghikai halor ka arts bad commerce khamtam na ka bynta ki samla pule kiba wan na ki longïing kiba duk ba kyrduh. U Bah Skhemboklang u la pynïasoh ruh bad ka Department of Philosophy ha St. Anthony’s College (Evening College) da kaba lah ban ïakhun ïa kiba bun ki jingeh bad ban kynjoh sha ka 72% ha ka graduation jong u.
Ha kane ka prokram la pynkup burom ïa 6 ngut ki Ph.D., nangta ïa ki Rank Holder hapoh ka Undergraduate NEHU Examinations kiba kynthup ïa ki 128 ki undergraduate students ha ki kyrdan bapher bapher, nangta ki Gold Medalists ba kynthup ïa ki 23 ngut ki samla pule kiba la pass bha hapoh ki undergraduate program, katba ki 4 ngut ki samla pule ki la ïohlang ïa kane ka kyrdan ha ka postgraduate program. Ha kaba ïadei pat bad ki Outstanding Achievement ka la don ruh ka jingpynkup burom ïa ka M.Sc. Biotechnology program kiba la ïoh ïa ka 100% pass result.
Ha kane ka sngi ruh ka la don ka jingpynkup burom da ka Silver Jubilee Milestone ïa Prof. Anjan Das na ka Department of Computer Science ba la pyndep ïa ka jingshakri ha ka kam hikai mynta la 25 snem.
La ïathuh ruh ba ka Pass Percentage ha baroh ki liang na ka bynta undergraduate program ka la long 79.63%, katba ha ka postgraduate program ka la poi ha ka 82.50%.
