Lap ki pulit na ka jingtohkit ba dawa pisa biang ka HNLC na ki heh saipan haduh 15 lak shaneng

Shillong, Nailur 19 : Ka Tnad Meghalaya Police ka la register case halor ka jingsam shithi dawa pisa jong ka seng Hynniewtrep National Liberation Council (HNLC) sha ki nongkhaïi ha Shillong.
“Ngi la register ïa ka case halor kane ka kam bad ka Sadar Police Station. Kane ka dei kaba la leh halor ka jingtohkit bala pynlong da ki kyrdan SP. Ki la pynthikna ba ki briew (Nongkhaïi) ki la ïoh pdiang ïa ki shithi dawa pisa bad kumta kila register ïa ka case bad ka jingtohkit kala iaid shakhmat” ong uwei u Heh Pulit.
“Ki don katto katne ngut kiba la wan pyntip ïa kane ka jingjia sha ki Pulit (ba ïoh pdiang ia ka shithi dawa). Don ruh kiba kloi ban aiti da ki jingujor” ula ong.
Ka tyllong khubor ka pyntip ba uwei u nongshong shnong ka Shillong ula buh ïa ka jingujor haka 16 tarik Nailur ba pyntip ba ula ïoh jingtip halor ka jingsam shithi dawa pisa ha kaba ka HNLC kala dawa haduh T.15 lak na ka bynta u snem 2024 na ki nongkhaïi ha Police bazaar, Shillong.
Ha kajuh ka por, la ong ba ka HNLC kala byrngem ïa ki nongkhaïi ba kim dei ban pynlip ïa ki mobile phone/kylliang ïa u numbor bad byrngem ruh ïa ki bad ki nongtrei ba kan shim ïa ki sienjam ba tyngeh.
Une u Heh Pulit ula kyrpad ïa ki nongshah dawa pisa ba kin pyntip ïa kine ki kam beaiñ sha ki Pulit. Hynrei ula ong , ba kito ki briew kiba kloi ban siew ïa ka pisa, kin ngat ha ka jingpynsajia jong ka aiñ namar ka jingai pisa ka long kum ka jingbei tyngka ïa ki kam pyntriem.
Ha kajuh ka por, ki SP jong kiwei ki District ka Eastern Range ki dang pynlong ïa ka jingtohkit halor ka jingsam shithi dawa pisa da ka HNLC hala ki jong ki jong ki District.