Ban pynkut ïa ka thungkam bahaïing ha MPSC sam ka KSU da ki kot lyngkdop sha ki paidbah

Shillong, Nailur 19: Kum shi bynta ban pynjur ia ka jingpyrshah na ka liang ka Khasi Students’ Union (KSU) ha ka sngi Palei, ka la sam ïa ki kot lyngkdop ban pynshai ïa ki paidbah halor ki 20 tylli ki mat ba donkam ban shim ha ka ban pynthymmai ïa ka rukom treikam jong ka Meghalaya Public Service Commission (MPSC) ban dup lah ban pynkut noh ïa ka jingjied tang ïa la ki bahaïing hasem bad kiba ithuh ithaw nalor ka bamsap ha ka jingthungkam thungjam ha ki tnat Sorkar.
Ha kaba iadei bad kane kine ki 20 tylli ki mat jingpynkylla ki kynthup ïa ka jingthung ïa u Chairman bad ki dkhot ka Commission kiba la biang kyrdan ki bym don jingïadei bad ki kam saiñ pyrthei, ban pynbna manla u snem ïa ka nongkynti bad ki ram ki shah jong ki shakri Sorkar ba kynthup ïa u Chairman, ki dkhot bad baroh ki nongtrei kiba trei hapoh ka Commission bad ban pynkha ïa ka Vigilance and Anti-Corruption Directorate.
Shuh shuh la ong ba ki nongaplai kam ki dei ban long ki nong Meghalaya bad kiba hap tip ïa ka ktien Khasi bad Garo haba aplai ïa kino kino ki kam ha MPSC, ban pynlong ïa ka combined competitive examination ïa ki kam kiba dei kajuh ka jingsiew bad ka kyrdan, MCS/MPS bad kiwei ki post dei ban pynlong manla u snem, dei ban pynmih ïa ka calendar ba man u snem ïa ki sngi ba kongsan ban pynlong eksam da ka Commission.
Na ka liang ka KSU ka la ban jur ïa ka jingdonkam ban pynmih paidbah ïa ki mark ba ïoh da ki nongaplai kam ha kino kino ki eksam, kiwei kiwei ki test bad ki personal interview jong ki kam ba la pynlong da ka Commission, ym dei ban pynkylla ïa ki roll number jong ki kyrtong ne candidate hapdeng ka jingïakhun kam, ym ban pynkylla ïa ka rukom thungkam thungjam shisien ba la sdang ki kam, dei ban ai ïa ki carbon copy jong ka ORR sheet sha ki kyrtong, dei ban pyllait ïa ki answer key hadien ka eksamin bad ban buh da ka por na ka bynta ban tynjuh pyrshah ïa ki answer key.
Shuh shuh na ka liang ka seng ka la ai jingmut ruh ba ka jingpynïaid ïa ki kam thungkam ka dei ban dep hapoh ka 6 bnai naduh ka sngi ba pynmih ïa ka jingpynbna laitkam, ban pynduh noh ïa ka personal interview jong ki Grade B, C bad D, dei ban ring video ïa ka interview jong ka Grade A, dei ban pyllait paidbah ïa ka kaiphod ba shisien shisnem jong ka Commission, dei ban pynthikna ba ki jingkylli kim dei ban lait tuh, pynkha ïa ka Grievances Cell hapoh ka Commission, dei ban buh ïa ki separate cadre ïa ka Meghalaya bad ka jingleh test da ki kor computer hadien habud.
Ha ki kot lyngkdop la ong ka KSU ka thrang ïa ka jingthung kam kaba leh hok bad ba shai ha baroh ki kam Sorkar bad kam shimet bad ban pynkut noh ïa ka jingthung kam tang ïa la ki bahaïing hasem ne kiba ithaw ne kiwei kiwei kiba ym ïaid katkum ki kyndon.
Kine ki jingai jingmut ki dei ïa ka ban pyntreikam noh mardor ban pynkylla thymmai, pynbeit bha bad pynwandur thymmai ïa ka rukom treikam jong ka Commission bad ka jylla baroh kawei kaba la dap da ki kam bym lehhok, jied bahaïing bad ibeiñ ïa kiwei, ong ka jingthoh ha ki kot lyngkdop.
Na ka liang ka KSU ka ong ba ka la shem ba ha palat 50 snem naduh ba mih ka Commission, kam shym la don ka jingkylla lane jingpynkylla ïa ka 1972 Regulation ka ban lah pynbit pynbiang ïa ka jingdonkam jong kane ka juk ba mynta bad kam shym la don ruh ki rule thungkam lane rule eksam ban wanrah ïa ka jinglong kumjuh ha ka jingpynïaid ïa ki eksamin thungkam, kaba lam sha ka jingleh bym hok bad kaba shong beit ha ka mon jong ka Commission.
Shuh shuh ka KSU ka la dawa ïa ka Sorkar jylla ba kan pynkylla ïa ki kyndon treikam jong ka Commission bad ban wanrah ïa ka kyndon ne rule thungkam bad ïaleh eksam kaba long kumjuh nalor kiwei kiwei ki jingpynkylla kiba donkam ban kyntiew ïa ka Commission.