Shillong, Nailur 19: U MDC ka BJP na Tura u Bernard N Marak u la ong ba ka jingïakhih jong ki nongtrei ka GHADC ka la long kaba jop.
Ïa kane u Marak u la ong ba ka Executive Committee jong ka GHADC ha kaba khatduh ka la mynjur ban siew ïa ka tulop jong ki nongtrei ka Council ka ban long katkum ka jingmynjur hapoh ka 5th Pay Commission.
U la ong ba ka Council kadei ban pyrkhat ïa ka jingshisha ba ka jingpynbna la dep ban pynmih da kiba bun ki NPP Executive Committee bad kumjuh ruh kane ka Executive Committee kaba mynta kaba la pynskhem ïa kane ka bynta.
“Nga pynpaw ka jingai khublei ïa u CEM bad ka kynhun jong ki Executive Member ba ki la shim ïa kane ka sienjam kaba shlur. Kadei ka kamram jong baroh ki dkhot kiba la shah jied ban peit ïa ka bha ka miat jong ka Council bad ki nongtrei jong ka. Da ka jingpyntreikam ïa ka 5th Pay Commission kan long ka kam kaba eh na ka bynta ka GHADC hynrei da ka jingïatreilang yn lah ban rat ïa kine ki jingeh,” ong u Marak.
“Namar kata tang ka NPP marwei kan ym lah ban mad ïa ki jingeh ka GHADC, hynrei lyngba ka jingsynshar ka BJP ha ka sorkar pdeng. Kumjuh ruh da ka jingmynjur ïa ka jingïasoi soskular da ka ANVC ka la nang pynkhlaiñ ïa ki ADC ha ka jylla,” u la bynrap.
