Mawpud, ‘Nailur 16 : Ka long kaei kaei ka jingsngewkmen bad ai mynsiem na ka bynta ki longïing ki bym kot bor ha kaba ki shi paralok ha ryngkat ka jinglam lynti jong ka ïing ka sem jong u bah Pynsuklang Wanniang bad ki para shnong ki la ïoh ban ïa noh synñiang shi paralok bad ki la ïoh ban pynshna ïing ïa kawei ka longïing kaba shem jingkyrduh.
Lah ban kdew ba ka jingïoh ban leit pynshna ïing jong ki shi paralok ka dei ïa ka ïing jong ka kong Screenlyne Mawlein kaba don 6 ngut ki khun kiba shong ba sah ha shnong Mawpud, South West Khasi Hillls District ha kaba u kpa jong ka ïing uba ju long u nongkit nongbah ha ïing ha sem u la khlad noh na kane ka sla pyrthei.
Ha shwa ban aiti ïa kane ka ïing, la ïoh ka jingkren ba lyngkot na u bah Pynsuklang Wanniang bad u bah Mandilos Nongbri kum u kongsan. Nangta, ka jingduwai kyrkhu kyrdoh na u Pastor B.B. Kharwanniang ha ryngkat da ka jingïadonlang kiba ha ïing ha sem jong ka kong Screenlyne Mawlein bad ki 6 ngut ki khun, kumjuh ruh na ki katto katne ki paralok kiba la ïa don kti lang ban pynshna ïa ka ïing.
