Nongpoh, Nailur 16: Ka Mawryngkang Primary Agro Ecology Cooperative Society Ltd. kawei naki kynhun sengkam lajong mynta ka sngi kala ioh ban pynlong ïaka prokram halor ki rukom shna bad pynmih ïaki jait jingbam bapher bapher (Initiative Program of Food processing Unit) haka shnong Mawryngkang ban pynpaw pyrthei ïaki kam ki jam ba kum ka kynhun kala leh kaba long ruh ka jingai mynsiem ïa kiba bun ba lang.
Ha katei ka prokram la wan ruh ban ai mynsiem da u Bah Mayral Born Syiem MLA ka Nongpoh kum u kongsan haka jingdonlang u Bah George B Lyngdoh MD ka Meiramew State Agro Ecology Cooperative Society, ki ophisar jong ka tnad District Horticulture, Ribhoi District, ki dkhot jong ka kynhun Meiramew, ki rangbah Shnong kiba marjan lem bad ki dkhot jong ka Mawryngkang Primary Agro Ecology Cooperative Society Ltd. lem bad kiwei kiwei.
Kum ban shu pynpaw katei ka Society ka dei kaba dang shu seng nang jan bad ka jingthmu jong kane ka society ka long ban nang kyntiew ïaki kam rep kam riang bad sengkam lajong lyngba ka Food Processing Unit ban pynmih ïaki jait jingbam bapher bapher bala saiñ naki soh ki pai bad ki jhur kiba ka mei mariang kala kyrkhu.
Naka liang u Bah Mayral Born Syiem kum u kongsan u la ai ka jingïaroh ïa katei ka kynhun halor ka kam kaba ki trei namar barabor ki briew kiba pyni shwa ïaka kam bad ka jingtrei shitom, ki lad jingïarap ruh ki wan, namar da kaba shong jaipdeh bad kwah tang ki lad jingïarap ka long kaba eh ïa kano kano ka kynhun ne ka sorkar ban ïarap.
U la kyntu bad ai mynsiem ruh ïa katei ka society ba kan nang lah ban trei shitom bad ban nang pynmih shuh shuh ki mar bam haki rukom bapher bapher bala shna bad saiñ naki soh ki pai bad ki jhur ban long ruh kum ka lad kamai ïa katei ka kynhun ba kin nang kiew shaphrang haka kamai kajih ban ieng hala ki jong ki kjat bad khamtam kan long ruh ka jingai mynsiem ïa kiba bun ki shnong bad ki khun samla ba khlem kam khlem jam
