Ka jingïakhih ka VPP halor ka jingkiew dor ki marbam ka dei ka buit Politik suda : Comingone

Shillong, Nailur 13: Ha kaba ïadei bad ka jingkiew ki dor marbam ha ka jylla na ka liang u Myntri Sorkar ba khmih ïa ka tnad Food & Civil Supplies Bah Comingone Ymbon, ha ka sngi Thohdieng ula kynthoh pyrshah ïa ka jingïakhih jong ka Voice of the People Party (VPP) halor ka jingkiew dor jong ki marbam mardih ha ka jylla, da kaba ong ba kadei tang ka buit ban myntoi ka VPP ha ka kam saiñ pyrthei.
U la pynshai ruh ba ka jingkiew dor ka dei namar ka jingeh ha ka jingpynpoi ïa ki marbam, ki jingduna ha ki jingtei bad ki jingjia ba shabar u pud ba lah ban leh eiei kum ka jingkylla ka suiñbneng, hynrei kam don satia, kano kano ka jingpynïaid bakla jong ka sorkar jylla.
Ha kaba ïadei bad kane haba ïakren bad ki Ladpathai khubor, u Bah Comingone Ymbon ula batai ba ka jylla Meghalaya ka shaniah tylli ha ka jingwanrah ïa ki marbam mardih kiba kongsan nabar, namar ka jylla kam dei ka jylla kaba pynmih bun ïa ki jhur ne ka doh. Kane ka jingshaniah ka pynkiew ïa ka dor ka mur.
“Ngi ha Meghalaya ngi shaniah ha ki jylla kum ka Maharashtra bad Bihar na ka bynta u piat,” ong u Bah Comingone haba bynrap “Ka jingbym don ki lynti rel bad ka jingshaniah tylli ha ka leit ka wan da ki kali, ka la pynkiew ïa ka jinglut jingsep ha ka kit ka bah bad kane ruh ka lam sha ka jingkiew dor.”
U la ong, ba kawei ka dawbah kaba ktah ïa ka dor ka dei namar ka jingdon jong ka jingkhang kaba dang shen ïa ki kali heh kiba kit palat ïa ka 4 metric ton ban ïaid lyngba ka jingkieng Umïam. Ki trok kiba kit ïa ki jhur bad kiwei kiwei ki mar kiba kongsan na Assam mynta ki hap ban ïaid da ka lynti kaba kham jngai lyngba ka Mawryngkneng, kaba pynkiew ïa ka bai kit na ka T.100 sha ka T.200 ban pynpoi ia ki marbam sha Shillong bad kane ka jingeh ka la pynlong ban don ka jingkiew dor ha ka jylla.
U Myntri Sorkar ula kdew ruh ba ka jingbym don lynti rel ha kiba bun ki bynta ha Meghalaya ka la nang pynsniew shuh shuh ïa ka jinglong jingman bad ula ai nuksa ba ka lynti rel ha Mendipathar ha rilum Garo ka lah ban pynhiar ïa ka dor.
“Ha Rilum Garo, ngi don ïa ka lynti rel, u khaw u kham tad dor haduh T.13 haba ïanujor bad ka nongbah Shillong, kaba ngi shaniah ha ka jingkit jingbah da ki kali,” ula batai.
Haba pynpaw ïa ka jingsngewkhia halor ka jingïapher ka dor hapdeng ka Meghalaya bad kiwei ki jylla, u Myntri Sorkar ula ong ba ka jingïapher kam da long kaba jur kumba kam kiba kynthoh.
“Ngi don ïa ki jingtip. Nga tharai ha kiwei pat ki jylla, ka dor ka mur, ka jan ïa long mar kumjuh hi. Lehse ka jingïapher ka long tang 50 haduh 100 percent, hynrei kata ka long ïa ki jhur ki jhep. Kam don than kano kano ka jingïapher kaba khraw ha kaba ïadei pat bad kiwei ki mar kiba kongsan,” la pynshai u Myntri Sorkar.
Halor ki jingkynnoh ba don ka jingpynkylla ïa ka dor ka mur, u Bah Comingone ula pynthikna ïa ki paidbah ba ka sorkar jylla ka la buh ïa ka Price Monitoring System ka ban pyrkhing ïa ka dor jong ki marbam mardih kiba kongsan.
“Ka dor ka lah ban ïapher khyndiat ha ki shnong bapher bapher. Nuksa, ki ïew dielang kum ka ïewduh ki don ka dor kaba kham duna haba ïanujor bad ki dukan kiba die khutia. Hynrei baroh ki dukan ki dei ban pyni ïa ka dor ka mur ha ki sleit bad ka Price Monitoring System ka pynthikna ba kam don ka jingpyni ïa ki dor ne ka jingdie tuh,” ong u Bah Comingone.
U Myntri Sorkar ula pynksan ruh ba ka tnad jong u ryngkat bad ki District Commissioner ki dang peitngor bha ïa kane ka jinglong jingman. “Katkum ka jingtip na ka tnad bad baroh ki District Commissioner, ki trei bha man la ka sngi ïa ka kam. Ka dor ka long kaba biang bad na ka sorkar, ngi pyrshang ban trei shitom,” ula ong bad bynrap, “ngi la dep 442 tylli ki jingleit jurip bniah ha u snem 2024 bad ka sorkar ka dang long kaba peitngor ha kaba khanglad ïa ka jingdie tuh ne ban jingpynkylla ïa ka dor.
U la ïathuh ba la buh ïa ka ‘Dashboard’ ban khmih bniah ïa ka dor jong ki marbam kiba kongsan ha kylleng ki jylla bapher bapher, ïa kaba ym donkam ban phah briew ban leit peit ïa ka dor jong ki marbam. ïa katei ka Dashboard la thaw da ka Ministry ban peitngor ïa ki dor ki mur jong ki marbam kiba kongsan ha man la ki jylla. La pyndonkam ïa katei ka rukom treikam ban ïanujor ïa ki dor ka jylla bad ki jylla kiba marjan bad ban pynthikna ba kan long kaba khuid bad shai kdar.
U Bah Comingone Ymbon ula pynthikna ïa ki paidbah, ba ka sorkar ka leh lut ïa kat kaba donkam ban pynbeit ïa ki dor bad ban ïada ïa ki nongthied na ka jingkiew dor kaba khlem nongrim, wat hapdeng ka jingmad ka jylla ïa ki jingeh bapher bapher.
Katba na ka liang jong u Commissioner & Secretary ka Tnat Food and Civil Supplies, u Pravin Bakshi, ula batai ha kano ka rukom ka jylla ka la pyntreikam ïa ki sienjam ban khmih ïa ka jingkiew ka dor ka mur ha ka jylla bad ban pynneh ïa ka jingryntih lang. Hynrei ula pynshai pat ba ka jingïapher ka dor ha kiwei pat ki jaka kadei namar ba ki don ki dukan kiba dei ban shim rem katba don pat kiba shim duna bad kumta kala mih ka jingïapher.