Tura, Jylliew 01 : Ka jingpynkylla kyteng ba dang shen jong uwei u nongwei uba kyrteng u Osman Islam Goni sha ka jait Osman Goni Marak kat kum ka affidavit ba u la smai hakhmat ki majistor ka pynpaw ba u pyrshang ban ïoh shim kabu ïa ki hok ki riti dustur ba ki riewlum Garo ki dei ban ïoh namar tang namar ba u kylla Khristan u thmu ban shim kabu ban pynkylla sa ïa ka jait ruh sha ka jait Garo.
U MDC jongka Rongram u Rinaldo K Sangma u la ong “ Kane ka jingpynkylla jait jong une u nongwei ka la pynbitar ïa ki paid Garo hadien ba ki la ïohi na ki lad pathai khubor kiba la saphriang lut ha kylleng ka jylla. Ka rai jongka ïing Bishar Supreme Court ka long ba ïa ka jait jong u briew ka dei ban long kat kum ka jait ka kynja ba la kha ïa u bad ym lah ban pynkylla satia. Hynrei kumno une u briew u Osman Islam Goni u pynkylla sha ka jait Osman Goni Marak. Ka jingthmu jongu ka long ban ïoh shim kabu ïa ki hok, ki riti ki dustur jong ki jaidbynriew Garo. ïa kane ka jingpynkylla jait jongu ruh yn ym pdiang dalei lei ruh da ki jait Marak”.
“ Nga kyntu jur ïa ka sorkar bad ki bor synshar district ha ri lum Garo, ka GHADC bad ki Bar Association ba ki dei ban num ithuh ia kum utei u briew bad ki dei ruh ban husiar ba ym dei ban don kiba ïoh shim kabu kum une u jait briew nangne shakhmat” ong u Rinaldo.
Ban ïada ïa ki riti ki dustur jong ki jaidbynriew Garo u Rinaldo u kyntu ïa u CEM ka GHADC ban pynsted ban thaw noh ïaka Garo Customary Law kumba u la dep kular hapoh ka ïing dorbar GHADC. Nalor kata ula kyntu ruh ba dei ban thaw ne pynkhreh la ka jong ka Electoral Roll na ka bynta ka GHADC.
