Shillong, Nailur 12 : Ka Shillong Press Club (SPC) ka pynpaw ïa ka jingsngewkhia jur halor ka jingjia mynta ka sngi habar phyllaw jongka ophis treikam jongka ha Lower Lachumiere ha ka por 1 baje ei ei noh phai sngi ha kaba ki dkhot ka Hynniewtrep Youth Council (HYC) bad ki bor Pulit ki la dap smam hadien ba ki la ïoh jingtip ba ka seng Bramachari Mukundanand kaba mih khmat na ka bynta ka Jagatguru Shankaracharya Smani Avimukteshwaranda Saraswaty ki mut ban wan ai Press Conference ha Shillong Press Club.
Halor kane ki nongïalam ka SPC ki la ïakren bad kitei kiba thmu ban wan pynlong Press Conference da ka phone bad hadien ba ki la ïathuh ba u nongïalam jongki u dang slem ban poi Shillong la ïakren bad pynbeit ban pynsangeh noh shwa ïa ka Press Conference mynta ka sngi.
Ka SPC ka kwah ban pynshai kdar sha baroh ba ka dei ka Club kaba laitluid khlem kino kino ki jingshah teh shah khum bad kaba ïeng pdeng na ka bynta jong baroh naduh ki seng bhalang, seng niam, seng treimon sngewbha, ki riewshimet khlem da niew shilliang khmat la ki dei na kano kano ka jaidbynriew, kiba khraw kiba tri ne kiba rit ba ria ruh bad ka pdiang sngewbha ïa baroh ban pynlong ïa ki Press Conference hapoh ka Club.
Kane ka jingjia mynta ka sngi kaba la pynlong ïa ki bor pulit bad ki nongïalam seng bhalang ban ïalum ka la pynhiar dor ïa ka kyrdan, ka iktiar bad burom jongka Club kat haduh ban poi sha u pud ban shah kynnoh ba khlem ailad ban pynlong press conference ïa kaba ym dei pat ka jingshisha namar da ka jingïapynbeit lang la rai ban pynsangeh noh ïa ka Press Conference mynta ka sngi. Ngi kwah ban pynshai kdar ba ïa ka Press Conference la pynsangeh da ka Bramachari Mukundanand ym da ka SPC.
Hadien ka jingïakren sngewthuh hapdeng u President jongka SPC bad President jongka HYC la ïathuh ba ka rai jongki ban wan sha Club kam dei ban pynthut ïa ka Press Conference hynrei ban ïakynduh bad tohkit bniah na ki nongïalam katei ka seng ba thmu khang bam doh masi halor ka jingthmu jongki ban pynlong ïa kata ka rally ha ka 2 tarik u Risaw 2024 lane kata ka Gau Dhwaj Sthapana Bharat Yatra ban pynbna ba ka masi ka dei ka kmie jongka jaidbynriew. Ka Shillong Press Club kam don jingtip halor kane namar ym shym la pynpaw ei ei ha ka shithi ba la phah sha ka Club.
Nalor kata ka SPC ka kwah ruh ban pynshai ba kam ju ai da kano kano ka jingthoh sha kino kino kiba kwah ban pynlong Press Conference hynrei tang da ka jingïakren phone beit naduh mynshwa haduh mynta. Ka jingpynshai ka long ruh shwa ban pynsangeh ïa ka Press Conference la ïakren bad ki dkhot ka Jagatguru Shankaracharya Swami Avimukteshwaranda Saraswati (JSSAS) bad hadien ba la pyntip ba ki dang slem ban poi la pynsangeh ïa ka Press Conference kumta ban kynnoh ba pynsangeh ka SPC ka long kaba bakla bad ka bym don nongrim.
