Khlem poi pyrkhat, liem ka Meghalaya ha ka final jong ka U-17 Subroto Cup 2024

SHILLONG, Nailur 11: Ka Meghalaya ka la shah rem noh ha ka final hakhmat ka Manipur ha ka lympung ïalehkai U-17 International Subroto cup 2024 ha ka jingïakhun kaba la long ha ka sngi Balang ka 11 tarik Nailur 2024 ha Dr. Ambedkar Stadium, New Delhi.
Ka kynhun ïalehkai kynjat bol Under 17 ki khynnah shynrang jong ka Jylla Meghalaya ba la mihkhmat da ka Mynken Christian Higher Secondary School, Ri Bhoi ka la rem noh da 4-3 ha ka tie breaker hadien ba ki la ïakhaid da mar 1-1 kol ha ka jingïakhun.
Haba phai sha ka jingïalehkai, la sakhi ba ka Meghalaya ka kham khlaiñ bad ïoh ruh shi bun ki kabu, hynrei sniewbok baroh ki jingpyrshang thep kol kim shym la urlong. Ka kynhun ïalehkai jong ka Manipur ka la ïoh ban pynkhih jar hashuwa ban kut ka step (32 minit) ban lamkhmat ïa ka jingïalehkai.
Na ka liang jong ka Meghalaya ka la pyrshang katlah katïai ban ïoh pynphai bad dei ha ka khyllipmat shuwa ban kut ka por ka la ïoh ban pynïakhaid lyngba ka penalty na u Banpliebok Khongjoh (68 minit).
Shuwa kane, ka Manipur, ba la mihkhmat da ka TG English School jong ka Bishnupur, ka la shah pynduna sha ka 10 ngut ki player hadien ba u wei u bak u la ktah da ka kti ban khanglad ïa ka bol ban rung shapoh kol. Kane ka bol ka la dep ban jam shabar u laiñ hynrei u referee u khlem shym la rai kol, bad u la sei da ka red card ïa utei u player ka Manipur bad ai da ka penalty sha ka Meghalaya. Hynrei, kane kam shym la urlong naba u Alicestar Thangkhiew u la lait sharud.
Watla ka la ïoh kabu na ka jingduna player ka liang pyrshah, ka Meghalaya kam shym la lah ban pynurlong ïa ki kabu ba ka la ïoh, tad haduh ba kan da ïoh biang ïa ka penalty ba ka la ïoh pynïakhaid, ïa kaba u Banpliebok u khlem shym la pynsepei.
Ka Meghalaya ka la ïoh mynsiem hadien kane hynrei kam shym la lah satia ban pynkhih ïa ka kol ban jop.
Hadien ba la jam sha kaba kut jong ka por ym shym la bteng ïa ka extra time hynrei la jam beit beit sha ka tie breaker. Ka Meghalaya ka la kynduh jingeh hadien bym seisoh ar tylli ki penalty ba sdang katba ka Manipur ka la pynkhih baroh ar hynrei haduh ba la dep ban ïashut mar 5 sien ki la ïakhaid da mar 3-3. Nangta ka Manipur ka la lah ban pynrung ïa ka penalty ba tang shi sien (sudden death) katba ka Meghalaya ka la lait sharud, kaba la pynlong ïa ka Manipur ban rah ïa ka namlahduh.
Ha ka jingsam khusnam, u coach ka kynhun Meghalaya – Bah Kitborlang Kharlukhi u la shah jied kum u Best Coach katba u Banpliebok u la ïoh ïa ka nam Best Player. Na ka liang u coach ka Meghalaya u la ai khublei ïa baroh ki paidbah kiba la ai jingkyrshan naduh kaba sdang ïa ka tnad sports.