Khlem ïoh bai tiar ki VEC ka Lumshnong C&RD Block, watla pyllait pisa 15 klur duna

Khliehriat, Nailur, 10 : Ka kynhun jong ki VEC jong ki shnong kiba hap hapoh ka Lumshnong C & RD Block Association ha ka jingïalang ba la pynlong ha ka Lah Sngi u Blei ki la kren san halor ka jingpynshai kaba la wan na u Block Development Officer (BDO) jong ka Wapung C & RD Block uba la kynnoh kylla ïa ki VEC ba kim shym la wan aiti ïa ki Materials Bills jong ki ha ka por kaba biang.
Katkum ka jingpynshai na u BDO, u Dr T. Shylla u la pynpaw ruh ba ka ophis ka ladep ban pyllait ïa ka bai tiar jong ki VEC na ka bynta ka Finacial Year 2023-2024. Ka Association ka la sngew thamula ïa kane ka jingpynshai jong u BDO ka bym don nongrim, namar ki VEC ki juh phah ïa ki Utilization Certificate (UC) ha ka por kaba biang ha shwa ka Financial Year namar ki la tip shai ban phah ha ka por kaba biang, namar da ki phew tylli ki snem ki la trei ïa kane kam, hynrei mynta u snem une u BDO um shah ïa ki nongtrei jong u ban shim jingthoh ne ban pynrung ïa ki bai tiar watla ïa ki Bill la phah ka por kaba biang ruh, ong u kyrwoh na ka VEC Association Lumshnong C&RD Block.
Ki dkhot jong ka Association da ka jingsngewkhia ïa kane ka kam ki la ïakynduh ïa u BDO ha kine ki bnai ba ladep hynrei ka jubab kaba ki ïoh ka long, “ka Sorkar kam shah ban pynring ïa ki Materials Bill” bad kam ruh ba u BDO u la ai jingmut ruh ïa ki ban ïa kynduh ïa ki bor ba halor.
Halor kane ka nongrim ka Association ka la leit ban ïa kynduh ïa u Project Director DRDA, ka East Jaiñtia Hills, ïa u Deputy Commissioner jong ka East Jaiñtia Hills District bad ïa ka Joint Mission Director, SRES ban ïoh ïa ka jingpynshai hynrei kaba sngew phylla ka long ba ka Joint Mission Director ka la pynshai ba kam don kum kata ka aiñ ban ym shah ban pynrung ïa ki Materials Bill hadien ba la dep ban pyntrei ïa ka kam.
“Shuh shuh ka Joint Mission Director ka la pyntip ba ladep ruh ban pyllait ïa ka bai tiar kaba duna T. 15 klur ban ai sha ka Wapung C&RD Block bad ïa ka Lumshnong C&RD Block, hynrei sngewsih ban ïathuh ba ym don tang kawei ruh ka VEC kaba hap hapoh Lumshnong C & RD Block ka ba ïoh ïa ka bai tiar jong ka Financial Year 2023-2024, hynrei u BDO u la thok pylleiñ pylleiñ ha kaba u la pynpaw ba u ladep ban pyllait ïa ka bai tiar sha kine ki VEC kiba don ha Lumshnong C & RD Block. Shiphang u ong bym shah ka Sorkar Jylla ban pynrung, shiphang pat u kynnoh ba slem ban phah ïa ki bai tiar ne Naterials Bill, ym sngawthuh sngewthaw shuh kane ka ka jingkyllaiñ khlieh-khlieh, tdong-tdong jong u BDO. Balei une u BDO um shym la kren shai, hynrei u la kynnoh pynban ïa ka Sorkar namar bym shah ban pynrung ïa ki Material Bills bad kynnoh ruh ïa ki VEC namarba ki slem ban phah ïa ki bai tiar. Kane ka bym lah ban pdiang. Ka Association ka pyrshah ïa ka jingkren kyllaiñ u BDO kaba shiphang da kumne shiphang da kumtai,” la ong u kyrwoh.
Ha ka Lah Sngi u Blei mynta ka taïew ka Association ka la leit ban ïa kynduh biang ïa u BDO da ka jingmut ban ïakren markhmat hynrei um don satia ha ophis.
‘Wat haba ngi ladep ban ai jingtip shwa ïa u ruh hynrei haba pyrshang ban telephone ïa u da ki phew sien ruh um shim saia ïa ka phone call. Ki VEC baroh ki la pynpaw ïa ka jingsngew lyngngoh ïa kane ka jingleh jong une u BDO bad hadien kane, na ka liang jong ki VEC ki la ai noh da ka jingthoh khnang ba une u BDO un pynshai ïa kane ka jingkynnoh jong u ïa ki VEC kiba don ha Lumshnong C & RD Block,” la pynkut u kyrwoh na ka Association VEC Lumshnong C&RD Block.