Shillong, Nailur 08: Ka jingïakynad hapdeng ka ri India bad China ka la sdang paw biang ha kine ki sngi ba kaba sa shisien pat ka la don ka jingkyntur pud jong ki shipai People’s Liberation Army (PLA) ka China shapoh u pud u sam ka India ha ka thaiñ Kapapu jong ka Arunachal Pradesh, ha kaba kane ka la pynkyndit ïa ka Sorkar India bad buh ruh ka jingma ïa ka ri baroh kawei khamtam ha kitei ki thaiñ.
La ong ba katkum ka khubor na ki shipai, la ïathuh ba ki shipai PLA kila wan rung haduh 60 km shapoh u pud u sam ka India ha Arunachal Pradesh. Ki la rung na ka thaiñ Kapapu kaba hab hapoh ka Anjaw District la katto katne por kumba la ïohi hi da ki bor pynïaid.
La ïathuh ruh ba la lap ïa ki dur ba thang ding, ki jingtah rong ha ki maw bad ki marbam jong ki China na ka thaiñ kaba pyni ïa ka jingwan rung jong ki shipai China kaba la jia la kumba shi taïew.
Ki dur ki pyni ruh ïa ka dak thoh bad u snem, ka dak ba ju leh da ki shipai China haba ki wan rung shapoh u pud u sam ka Ri India ban kam trai ïa ki jaka.
Lah ban ong ba ha u Nailar 2022, ki video ki la saphriang ha ki social media ba pyni ba ki shipai PLA kila leit jngoh ïa ki jingtei hajan ka Hadigra Lake, ha ryngkat bad lai tylli ki puh shilum ba trei ha kane ka jaka.
Lah ruh ban pynkynmaw ba ha u snem 2020, ki shipai China ki la rung sha u pud ka India ha Dibang Valley District. Bad ha u snem 2019, ki shipai PLA kila shna ïa ka jingkieng dieng halor ka Doimru Nalah, kaba jngai kumba 49 km shapoh u pud u sam ka India ha Amako Camp.
La ong ruh ba ka ktem ba khatduh eh jong ki Indo-Tibetan Border Police (ITBP) ba marjan ka Hadigra Pass ha ka McMahon Line ka dei kaba don ha Kapapu katba ka Chaglagam, ka administrative circle ba jan dei ha Anjaw District, ka jngai kumba 90 km na McMahon Line.
