Lisbon: Ka dei ha ka shiteng miet jong ka Sngi Palei ha ka minit ba 34 ba u khlur ba paw nam jong ka pyrthei u Cristïano Ronaldo, u la pyni sha ka pyrthei ba kum uwei na pdeng ki rangïalehkai phutbol u ban poi sha ki 900 tylli ki kol ha ka jingim jong u kum u rangïalehkai.
Une u rangïalehkai ba la 39 snem ka kyrta u la ïarap ban pynliem noh da (2-1) ïa ki rangialehkai ka ri Croatia, kaba la long ha Lisbon (Portugal) jong ka UEFA Nations League.
ïa ka kol ba nyngkong la pynkhih jar da ka Portugal lyngba u Diogo Dalot ha ka minit ba 7, sa pynbud u Ronaldo ha ka minit ba 34, bad ha minit ba 41 ka Croatia ka la ïoh shi kol lyngba ka jingbakla jong u Diogo Dalot.
Ka Portugal ka don ha kynhun League A Group 1, kynthup ïa ka Croatia, Scotland bad Poland.
U Ronaldo u la dap da ka jingkmen ha ryngkat bad ki ummat hadien ba u la ioh ban thep ia ka Kol ba 900.
U Ronaldo u ong ba kam pat biang ia nga tang 900 kol hynrei haduh ba ngan da ioh ban thep 1000 tylli tam ki kol.
KI KOL JONG U RONALDO BAD KI KLOB
Ka kol ba nyngkong eh jong u Ronaldo, ka dei ha ka 7 tarik Risaw 2002 na ka klob Sporting ha kaba u la ioh ban thep 2 kol pyrshah ia ka Moreirense.
U la leit sha ka Manchester United ha u snem 2003, ha kaba u la thep 118 kol ha ki 293 tylli ki jingïakhun .
Ha u snem 2009 u Ronaldo u la leit pynïashoh noh sha ka klob ba radbah jong ka ri Spain ka Real Madrid, bad dei ha une u snem ba u Ronaldo u la pynkheiñ ïa ka rekod kum uwei na ki rangialehkai barem dor tam jong ka pyrthei, ha kaba ka jingsiew ia u ka kot shaduh ka 94m Euro (Rs. 8,77,17,04,000.00 ha ka pisa India).
Ha ki hynñiew snem ha ka jingmih madan jong u ha Spain,u Ronaldo u la thep 450 kol tang ha ki 438 tylli ki jingïakhun.
Ha u snem 2018 u Ronaldo ula leit pynïasoh noh ha Italy, na ka klob Juventus ha kaba u la ïoh ban thep 101 kol ha ki lai snem ki jingialehkai jong u bad kane klob.
U Ronaldo u la leit phai biang sha ka Manchester United ha u snem 2021, ha kaba u thep 27 kol ha ki 54 tylli ki jingïakhun.
Hynrei na ki jingmih ki kynrum kynram ha Manchester United, U Ronaldo u la shim ïa ka rai ban leit mih madan noh sha Saudi Arabia ryngkat bad ka Al-Nassr ha u snem 2023 ha kaba u dang ioh ban thep 68 kol ryngkat bad kane ka klob kaba u don mynta.
Haba phai sha ki jingïalehkai jong u bad ka ri, u Ronaldo u la ïoh ban pynkhih jar kumba 145 kol na ki 200 tylli ki jingmih madan bad ka ri.
