SHILLONG, Nailur 05: Ka Lumparing SC (Group-B) bad ka Mawkriah West SC (Group-C) ki la ïoh ban khur pura ïa ki lai point hadien ka namjop ha ki jingïakhun ba la long ha ka sngi Palei jong ka lympung phutbol Second Division 2024 jong ka Shillong Sports Association ha SSA Ground, Polo.
Na ka liang jong ka Lumparing SC ka la lah ban pynliem da 3 kol ïa ka Umlyngka SC, katba ka Mawkriah West SC ka la jop salit da 2-1 kol ïa ka Lawmali .
Haba phai sha ka jingïakhun kaba nyngkong, ki lai kol kiba la pynthikna ïa ki lai point na bynta ka Lumparing SC la pynkhih da u Rionald lyngshiang (18 minit), u Wanshan Nongkhlaw (60 minit) bad na u Riskhem Syiem (90+1 minit) shuwa ban kut ka por.
Lah ban kdew ba ka jingïakhun kaba bud ka long kaba itynnat bad kaba mar ïabiang, baroh ar kynhun, ka Mawkriah West SC bad ka Lawmali SC ki la pyrshang tyngeh ban ïoh pynkhihjar hynrei dei ka Mawkriah West SC kaba la ïoh thep tam da 2-1 kol ban khur shalade ïa ki lai point.
Baroh ar kol ïa ka Mawkriah West SC la thep da u Honour Nongbri (57 & 90 minit). Katba ka Lawmali SC ka la ïoh ban pynphai shi kol lyngba u Richmond Buam (39 minit) lyngba ka penalty.
Ki jingïakhun ha kane ka sngi Thohdieng (06.09.2024) ha ka por 12:30 baje mynsngi ka Lumdiengjri SC bad ka Gorkha Association, ka jingïakhun kaba bud ha ka por 3:30 baje nohphaisngi hapdeng ka Mawpat SC pyrshah ïa ka Krang SC ha SSA Stadium, Polo.
