Sniewbok ba ki Balang ki khlem khotlang ïa ngi ban ïakren halor ka bamsap, ong u President NPP

Shillong, Jymmang 31 : U President ka NPP, Meghalaya, Dr.WR Kharlukhi u la ong ba ki sniewbok haduh katta katta ba ki kynhun Balang ki khlem khot lang ïa ki na ka National People’s Party sha ka jingïalang ban ïakren halor ka bamsap.
Haba kren bad ki lad pathai khubor, u Dr. Kharlukhi uba dei ruh u MP jong ka Rajya Sabha u la ong ba ka long kaba itynnad ban ïohi ba don ki nongïalam ha katei ka jingïalang kiba kdew kti ïa ka sorkar. “Lada don manga, ngam ong ïa kiwei, ai kein ban shah mon sngewbha ban tohkit da ka CBI namar ngi don ha ka politik ka don hok ïa ki paidbah ban tip haba ïa kren ïa ka bamsap,” u la ong.
Nalorkata, u Dr. Kharlukhi u la ong ruh ba kum uwei na ki ba la don slem bha ha ka saiñpyrthei ym duna shuh ïa ka 30, 33 snem u ïohi ba lada buddien bha ïa baroh kitei ki jingkynnoh ki nang mih shuh bun kiei kiei. “Lada ïa buddien bha, yn ong kumno lada wad bha naduh dang ïa heh ïa san ngi ïa ïoh katno bad kumno ki ïing dulan ki mih kynsan. Nga ruh la trei tulop bad ka tulop jongnga kum nonghikai ruh kam shym duna shuh, hynrei ban ïoh ïa ka ïing dulan te ngam ïoh phi,” u la bynrap shuh shuh.
Haba pynshai pat halor ka jingkynthoh halor ka jingkhyllem dang shen jong u Dome jong ka Iing Dorbar ba dang shna thymmai, utei u President ka NPP u la ong, “Ka Assembly ym dei ba peit mangi ka sorkar hynrei dei ba peit ka Assembly hi hynrei la shu kynnoh beit ïa ka NPP.”
Na ka liang jong u, u la ong ruh ba kim sngew phylla shuh ban ïohi ïa ki jingkynthoh ba harukom kaba ju mih na ka Liang Pyrshah. “Tangba nga ju ong haba phi kynnoh dei ban kynmaw pat namar haba phi kdew kti ïa kiwei lai tylli ki shympriah kti ki kdew pat shalade.”
Lah ban kdew hangne ba ha kane ka taiew baladep, ka Khasi Jaiñtia Church Leaders Forum (KJCLF) ka la lum ia ka jingïalang ki Nongsaiñpyrthei, ban ïasyllok halor ki ka kam bamsap. Hynrei na ka liang ka NPP kam shym la poi bad ki nongïalam ka Seng ki la ong ba kim shym la shah khot ne ïoh jingtip.