Shillong, Jymmang, 31: Da ki spah ngut ki nongshet ja sngi (Mid Day Meal) ha ki skul bapher bapher kiba don ha rilum Jaiñtia kiba don hapoh ka shatri jong ka All Jaiñtia Mid Day Meal Worker Union ki la pynlong da ka jingïakhih kaba shi sngi ha nongbah Shillong ban pynsngew sha ki tyndong skhor jong ka Sorkar ha kaba ïadei bad ka jingdawa ban pynkiew ïa ka jingsiew bainong.
Kane ka jingshah thngan kaba shi sngi ka long shi bynta na ka jingdawa jong ki ban pynkiew ïa ka bainong na ka T. 1000 hajar sha ka T. 5000 hajar bad kumjuh ruh ban kyntiew ïa ka bainong jong ki na ka 10 bnai sha ka 12 bnai.
Ki nong shetja sngi kiba dei na ka West bad East Jaiñtia Hills District ki la shim ïa kane ka rai ha ka jingïalang kaba la long dang shen ha Jowai ban ïakren halor ki jingeh ba ki ïakynduh na ka por sha ka por kum ki nongshet ja sngi ha ki skul ne kaba ki khot mynta ka ‘PM POSHAN’ skhim.
U President ka Seng u Bah Khroo. L. Pariat ha ka jingïakren bad ki lad pathai khubor u la ong, “ngi la pynlong ïa kane ka jingïakhih hadien ba la kut ka jingai por ïa ka Sorkar ha ka 21 tarik mynta u bnai ban dawa pynlait noh ïa ka bainong kaba dang sahteng naduh u bnai Naiwieng, 2021 haduh u Ïaiong, 2022.
Hadien ka jingïakynduh jong ki hynnin ka sngi bad u Dr. B.D.R Tiwari, IAS, Commissioner Secretary ka tnad pule ka sorkar jylla bad u Ambrose Ch Marak, IAS, Secretary Education kiba la ong na ka liang ka sorkar kan sa pynlait shen ïa katei ka bai nong ba dang sah jong baroh ki Mid Day Meal hapoh ka Jylla. Shuh shuh kila ai jingmut ba ïa ka pisa dei ban pynpoi beit ha ki bank Account jong ki nongshet ja hapoh ka Laskeiñ bad Thadlaskeiñ kumba leh ha baroh kawei ka jylla.
“Ngim banse ban pynlong ïa kane ka jingïakhih namarba ka Sorkar Jylla kam shym la siew tikna ïa ka bainong (honorarium), bad kaba ar ka long ban dawa pynkiew noh ïa ka bainong jong ki nongshet ja sngi ha ki skul,” u la ong.
Haduh mynta ki nongshet ja sngi ha ki skul hapoh ka jylla ki dang pyndonkam da ki dieng ban shet ban tiew ha ka jaka ban shet da u tyndong lyer shet (LPG) namarba ïa kane ruh ki ladep ban ujor naduh u snem 2019 kum shibynta ban lait na ka jingpom pathar ïa ki dieng.
Ka seng ka la dawa ïa ka tnat Pule Puthi jong ka Sorkar Jylla ba kan leh eiei noh mardor halor kane ka jingdawa jong ki nongshet ja sngi.
