Nongpoh, Jymmang 31: Ka HYC, Raid Nongtung Circle mynta ka sngi ka la pynpaw ka jingsngewkhia kaba jur halor ki kam leh donbor ka Assam bad kum ka seng ka la kynnoh ba kumno ki kam pynroi ba wan rah na ka sorkar Meghalaya la hap ban pynsangeh bad katba ki kam pynroi ba wan rah na ka Assam pat ha ki shnong khappud ba dang ïa kajia pud ki ïaid shaid khlem da don kano kano ka jingpynthud.
Ka HYC Raid Nongtung Circel ka la pynpaw ïa kane ka jingsngewkhia ka dei hadien ba ka la lap hi da la ki jong mi khmat ba ka sorkar Assam kam ju sngap ïa ka sorkar Meghalaya bad kino kino ki kam pynroi ba ka thmu ban leh ha ki shnong khappud ka ïaid beit shakhmat khlem da burom ïa ka sorkar Meghalaya.
Ka seng ka la pynpaw ruh bad ka la sakhi ruh ba ka jingkhlaiñ ka sorkar Assam ka pyni shai kdar ba kino kino ki skhim pynroi ba wan lyngba ka sorkar Assam kim shem la shah pynthut ne pynsangeh ha ka sorkar Meghalaya, hynrei ka Assam ka trei ha duh ban da dep khlem jingthud bad kaba ithamula ka long baroh ngi sakhi ba ka jingtlot ka sorkar jylla ka jong ngi ka pynsah teng lut ha man ki project ne ki kam pynroi ba ka Meghalaya ka pyntrei ha poh thaiñ khappud.
Ka seng ka la kynthoh jur ruh halor ki kam pynroi ka sorkar Meghalaya, dang ha ka 9 tarik Jymmang 2017 ka sorkar Assam lyngba ki pulit na poh Sabuda ki la pynsangeh bad khang pyrshah ïaka jingwan pynhap post elektrik ka sorkar Meghalaya ,bad ïakatei ka skhim sam bording ha Sabuda lah ioh na ka sorkar kmie lyngba ka sorkar Meghalaya bad kaba sngewkhia ka long ba ïakatei ka skhim sam bording khlem iohi shuh haduh mynta ba kin bteng ïaka kam bad ka la shukut khlem da ioh jingmyntoi ki paidbah.
Ha kawei ka bynta, ka seng ka buh jingkylli ïaki bor District jong ka Ri Bhoi bad ïa ka sorkar Meghalaya ba kumno ka Assam ka ïaid pyntrei pat mynta shaid shaid ïa ka jingsam bording ha ka shnong Madan Umwang, kaba dang dei ka shnong ba dang kajia pud bad katba ki kam pynroi kiba wan na Meghalaya kumba la jia ha ka shnong Sabuda ka jingthmu ban sam bording sha ki paidbah da ka sorkar Meghalaya ka la pulom kaba dei hadien ka jingwan khang pyrshah da ki Puliit ka Assam.
Ka seng ka la kynthoh ruh jan baroh ki kam pynroi ba wan rah ka sorkar Meghalaya naduh ki skul, ki ing dorbar, ki lynti ki synkien bad ka bording ilektrik la shah pyndik bad shah khang beit ha ka Assam bad katba ki kam pynroi ba wan na Assam pat la ioh lad ban pyntrei suk khlem kano kano ka jingpyrshah da ka sorkar Meghalaya.
Shuh shuh, ka seng ka la buh jingkylli hato ki bor synshar District jong ka Ribhoi ki lah ioh jingtip ne em na ka Assam ha shwa ba kan pyntrei ïakatei ka skhim sam bording ha Madan Umwang bad kiwei kiwei kiwei ki kam pynroi bad lada kim ioh jingtip ladei ka por ba ki bor synshar district na Ribhoi ki hap ban leit kyndang lut ïakitei ki post Elektrik ba la tei da ka Assam namar kane ka ka paw shai bad ka pynti ba ka Assam kam burom satia mar kylliang kum ba la ïakut. Ïa kane ka kyrwoh la pynlait da u President ka HYC Raid Nongtung Circle, u Samla Hercule Suting bad u General Secretary, u Samla Shemphang Masharing.
