Shillong, Jymmang 31 : Ka ïing bishar High Court jongka jylla ka la bthah ïa ka sorkar jylla ba kan pynshna da ka jingkieng nar ( Bailey Bridge) ban pynïasoh ïa ka Sonapur bad Borghat ha khappud Bangladesh katba ka mukotduma PIL hapdeng ka kong Kynjaimon Amse bad ka sorkar pdeng bad kiwei ka dang ïaid.
La pyntip sha ka ïing bishar ba dang shen dang ha ka 16 tarik u bnai Jymmang ka jingkieng kaba ju pynïasoh ia ka Sonapur bad Borghat ka la shah rong ha ka umsaw. Ka ïing bishar ka la bthah ïa ka sorkar ba kan shim khia ïa kane ka kam bad thaw noh da ka jingkieng nar ban ïoh ïaid ki kali bad ki briew na katei ka jingkieng katba ym pat lah ban shna da ka jingkieng dewbilat ka ban neh syndon.. Namar ba ka sorkar ka pan por ban ai ïa ka work order kumta ka ïing bishar ka la buh ba ka jingshong bishar kan long biang ha ka 20 tarik mynta u bnai.
Kane ka jingkieng ka dei ha Shymplong ha ka surok na Sonapur sha Borghat bad ka pynïasoh ia ki shnong Shymplong, Borsara, Lejri, Lahalein, Huroi, Hingaria kiba ym duna ïa ka 7000 ngut ki nongshong shnong. Kumba long mynta ym don surok ne lynti ïaid shuh ïa ki briew na kitei ki shnong khamtam na Lejri, Lahalein, Huroi bad Hingaria. Naduh ba shah rong ka jingkieng ki briew ki la ïa kynduh ïa ka jingeh kaba khraw ha ka leit ka wan bad ka kit ka bah.
