Shilong, Nailur 02: Ki la don kumba 235 tylli ki project ki bym la lah satia ban pyndep kiba la long ruh kum ki jingpynkheiñ kiba la ïaid lait ïa ka por ba dei ban pyndep kaba long 1-34 snem katkum ka 31 tarik u Lber, 2023.
Kane ka jinglut na ka bynta kitei ki 235 tylli ki project ka la kot sha ka T. 613.95 klur.
Ïa kane la pynpaw da Comptroller and Auditor General of India (CAG) hapoh ka state finances kaba dei ruh ka kaiphod ba ai jingkheiñ haba kut jong ka 31 tarik u bnai Lber, 2023.
Ka la ong ba ïa kine ki project la dei ban pyntreikam da ka public works department bad ka public health engineering department
“Ka la kdew ruh ba kumba 9,36 percent jong ki project ki la sah khlem da la lah ban pyndep kaba long ruh duna ia ka 50 percent ka jingpyndep ïa ka kam.”
Shuh shuh ka kaiphod ka ong ba la don bun tylli ki snem ha kaba ïa ki 17 tylli ki project la shu pynslem hapdeng ka 11 bad 34 tylli ki snem bad kumba 218 tylli ki project khlem lah ban pyndep hapdeng ka 1 snem bad 10 tylli ki snem.
“Shuh shuh ki fund ba la shim kylliang na ka bynta ban pyntreikam ïa kine ki project ha ki snem bapher bapher ka la lam sha ka jingkiew ka ram jong ka jylla,” ong ka kaiphod.
