Shillong, Jymmang, 31: Ka jylla Meghalaya ha ka sngi Baar ka la ïoh pdiang ïa ka khusnam kum ka jylla kaba la lah ban pyntreikam bha ïa ki projek ha ka kyrdan “the role of governments in the promotion of ICTs for development.”
Ïa kane ka khusnam la sam ha ka United Nation’s World Summit jong ka Information Society Forum 2022, ïa ki sienjam kiba ka Meghalaya Enterprise Architecture ka la lah ban pyntreikam bha ïa ki projek.
U Secretary General jong ka ITU u Houlin Zhao u la aiti ïa kane ka khusnam sha u Myntri Rangbah ka Jylla u Conrad K Sangma, ha ka jingïalang jong ka WSIS Forum Prizes 2022 kaba la long ha Geneva, Switzerland ha ka sngi Baar.
Ki don haduh 360 tylli ki projek ba la sam sha ki ri bapher bapher ïa kiba la bishar da ki nongbishar jong ka UN.
Hadien ka jingjied jong ki nongbishar la pynlong pat sa ka jingthep vote ban jied ïa ki 90 tylli ki project kiba bha tam ïa kiba la jied da ka Geneva, Switzerland na ka bynta ban ïoh pdiang ïa ka khusnam.
Ka Meghalaya ka la hap ban ïakhun bad ki projek kiba la shna ha Australia, China, Argentina bad Tanzania. Ha kane ka rynsan ka Meghalaya ka la shah pynbna kum ka jylla kaba ïoh ïa ka projek kaba paka tam. Ka Meghalaya Enterprise Architecture ka dei ka tang ma ka na ka ri India ban ïoh ïa kane ka khusnam mynta u snem.
Ïa ka Meghalaya Enterprise Architecture (MeghEA) Project la pyntrei da ka Planning Department jong ka Sorkar Meghalaya.
U Myntri Rangbah u la ai khublei ïa ka Meghalaya Enterprise Architecture kaba la lah ban pyntyllun shakhmat ïa ka jingshakri ka sorkar ïa ki paidbah katkum kane ka juk stad kaba mynta.
Lyngba ka Enterprise Architecture Project ka Sorkar Jylla ka la pyntreikam ruh lyngba ka juk stad teknoloji ban ïarap ïa ki longkmie ba armet, ban rah dawai da ki Drone bad bad kiwei kiwei de ki kam.
