Khliehriat, Jymmang 31: Mynta ka sngi ka 31 tarik u Jymmang la tip kum ka sngi ‘World No Tobacco Day’ kaba thmu ban pynsaphriang ïa ki khubor ban pynbna halor ka jingsniew kaba mih na kaba bam duma bad kaba dih duma, ïa kane ka sngi (WNTD) la sdang naduh u snem 1987 da ki dkhot jong ka World Health Organisation (WHO) bad mynta u snem ka phang pdeng jong kane ka sngi ka dei “U duma: Sumar ïa ka mariang’ (Tobacco:Treat to our environment) kaba long ha kata ka rukom ba ka jingpyndonkam palat ïa u duma ka ktah ïa ka koit ka khiah bad ïa ka mariang sawdong.
Kum ka khubor sha ki paidbah, u Deputy Commissioner ka East Jaiñtia Hills District, u Abhilash Banarwal,IAS, u la ong ba ka jingbam bad dih duma ym tang ba ka ktah ïa ka koit ka khiah hynrei ka ktah ruh ïa ka mariang sawdong bad ka jingpyndonkam palat ïa ki duma ka wanrah ïa ki jingpang jingshitom bad wat ka jingiap ruh, ka buh jingeh ruh ïa ki longiïng bad ong ruh ba ka prokram ToFEI kaba iatreilang bad ki samla ka lah ban wanrah ïa ka jingkylla ha kaba ïadei bad ka jingkyrni ka jingbam duma.
Ban pynshai paidbah ïa ka jingsniew ka jingbam duma, ka donkam ïa ki skul ba kin shim ïa ki bynta lane ban pynlong ïa ki prokram kum ki Rally bad ki Signature Campaign ban pyrshah ïa ka jingpyndonkam duma.
Myn ha u bnai ïaïong, ka tnat ka koit ka khiah ka la phah ïa ki memes ha ki whatsap sha ki nongpyniaid skul, ki Principal bad sha ki nonghikai bad pynshai halor ka jingma kaba mih na ka jingkyrni bam bad dih duma, ki la don ki memes kiba pyni ba kumno uwei u dieng u ing na ki 300 tylli ki skikret bad kumno ka tdem sikret ka ktah bad pynmih ïa ki lyer ba sniew ne ki chemical bad kumno ka jingbam duma bad ka jingbiah pathar ha ki jaka paidbah ka ktah, kine kiei kiei ba la phah ha ki whatsap la khmih lynti ba ki nonghikai bad ki bor pyniaid skul kin pyni bad pynshai lang sha ki khynnah skul bad ban pynlong ruh ïa ki prokram ban pynsaphriang ïa ka khubor halor ka jingma bad jingsniew na kaba mih na ka jingkyrni ka bam bad dih duma.
