Kyntu u DC ka EJHD ban pynbun ïa ki prokram bad ki lad ai jingpynshai halor ka jingpang HIV/AIDS

Khliehriat, Jymmang 31: Ha ryngkat lang bad ka pyrthei baroh kawei ha East Jaiñtia Hills District ruh la rakhe ïa ka sngi kynmaw burom ïa kito kiba la iap na ka jingpang HIV/AIDS da kaba thang momati kaba la tip kum ka ‘International AIDS Candlelight Memorial 2022, ïa ka prokram la pynlong ha Khliehriat Community Hall ïa kane ka prokram la khot pynlong da ka Meghalaya State Network of Positive People (MSNP+), ha ryngkat ka jingiatreilang bad ka Rashtriya Kishore Swasthya Karyakram(RKSK).
Haba kren ha ka jingialang, u Deputy Commissioner ka East Jaiñtia Hills District, u Abhilash Banarwal, IAS u la kyntu ïa baroh ki tnat treikam jong ka sorkar ba kin ia snoh kti lang ban pynlong ïa ki prokram jingai jingpynshai, ban pynlong ïa ki campaign ban pynshai halor ka jingshyrkhei ka jingpang HIV/AIDS, lah ruh ban pynshai da kaba tah poster lano da kano kano ka rukom.
Ha kajuh ka por, u Abhilash, u la ban jur ba dei ban pynshai ba ym dei ban don kano kano ka jingpeit beiñ ïa kito kiba pang HIV/AIDS bad iathuh ruh ba ka aiñ ruh ka pynkupbor ha kito kiba don ka jingpang HIV/AIDS ha kaba na ka liang ki bor synshar district bad kumjuh ruh ka tnat pulit jong ka East Jaiñtia Hills Dsitrict ruh kan pyntikna ba ïa kum katei ka ain yn pyntreyukan hapoh ka District.
Ka Incharge jong ka DIO East Jaiñtia Hills District, ka Dr N.P.Suchiang ka la iathuh ba ka thong kaba hakhmat eh jong ka Meghalaya State Network of Posotive People (MSNP+) ka long ban wad shuh shuh ïa ki briew kiba shah ktah ha ka jingpang HIV/AIDS bad ïa kane yn lad ban leh tang lyngba ka jingiatreilang jong baroh ki tnat sorkar, ki Sengbhalang, NGOs, ki kynhun bapher bapher bad ki paidbah.
Ka DR Suchiang ka la iathuh ruh ba ha East Jaiñtia Hills District ki la don lai tylli ki Centre kiba peit ïa kum kine ki jingpang (Diagnistic Centre), ki don ruh haduh phra jait ki jingioh jingiarap bad ar tylli ki ICTC ki don ha Khliehriat Civil Hospital bad ha Sutnga CHC, nalor kine ki don ruh ki centre ki ba peit ïa ki khyllung kiba la kha na ki longkmie kiba don ïa u khnaing jingpang HIV, kumta ka la kyntu jur bad pynshlur ïa ki briew kiba sngewthuh ne suba ba ki don kum katei ka jait jingpang ba kin wan shakhmat ban phah test bad ban shim ruh ïa ki lad ai jingsumar.
U Assistant Director jong ka Meghalaya Aids Control Society, u bah Ajoy.M.Lanong, u la pynshai ba kane ka jingrakhere da kaba thang mombati, ka International AIDS Candlelight Memorial ka long ban wanrah lang ïa baroh ki briew jong ka pyrthei ban pyndonburom ïa kito kiba la iap bad duh noh ïa la ka jingim na ka daw ka jingpang HIV/AIDS bad kumjuh ruh ban pyni sha ka imlang ka sahlang ia ka jingdonkam ban ïada badn sumar ïa ka jingpang HIV.
Haba kren shaphang ka aiñ HIV/AIDS Act 2017, u la iathuh ba ïa ka bill la dep shna ban ïada ïa ki hok jong kito ki ba don ïa u khñiang jingpang HIV bad hapoh kane ka aiñ ka long ban iada kito kiba la ioh ïa u HIV Positive kiba shah peit ibeiñ ha ka imlang ka sahlang bad kiwei kiwei ki lad ban iada ïa ki.
U General Secretary jong ka Meghalaya State Network of Positive People, u bah Barry.L.Kharmalki u la ong ba ka jingpang HIV, ka jingpang Tuberculosis (TB) lah ban ïada bad da ka jingiatreilang bad kiwei kiwei ki tant sorkar bad ka jingiasnoh ktia lang jongbaroh namar ki don bun kiba la iap ruh na ka daw ka jingpang TB.
Ïa ka jingthang momati la lam khmat da u Deputy Commissioner, u Abhilash Banarwal, IAS bad la ïa shim bynta lang da baroh kiba la ïa wan sha ka jingialang, hadien kane la pynlong ruh ïa ka jingsngap jar kaba shi minit bad la pynlong ïa ki jingdwai kyrpang na ka bynta kito kiba la shah ktah ha u khñiang jingpang HIV
Ha kane ka prokram la ioh ruh ïa ka jingphla (testimonial) na ka kong Agui Daimei bad na ka kong Virgil Suchiang.
Kiba la ïa don ryngkat lang ha kane ka prokram ki kynthup ruh, ka District Social Welfare Officer, East Jaiñtia Hills District, ka kong R.Pasah, u Teibor Kyndiah, District Child Protection Officer, East Jaiñtia Hills District, u bah Teibor Kyndiah, u Principal Jaiñtia Eastern College Khliehriat, u Dr P.Nongtdu, ka Adolescent Health Counsellor, Khliehriat Civil Hospital, ka kong Daphilin Pasah bad kiwei kiwei.