Nongpoh, Jymmang 31: Ban ïa snoh kti lang ha shi tyllup ka pyrthei ban rakhe ïa kata ka sngi kyrpang ba la tip kum ka ‘Wordl No Tobacco Day’ ban pyrshah ïa ka jingdih ne bam duma ba ka ktah ïa ka koit ka khiah jong u briew, ki samla pule ka Ri Bhoi College ha ka lama jong ka NSS Unit, Ri Bhoi College mynta ka sngi ki la rakhe ïa kane ka sngi kyrpang da kaba pynlong ïa kajingïaid paidbah ha Nongpoh bad kynthup ruh ka signature campaign shi bynta ban ïalap halor ka jingktah jong u duma.
Ki samla pule ka Ri Bhoi College ki la sdang ban rakhe ïa kane ka sngi da kaba pynlong shuwa ïa ka jingïaid paidbah ha Nongpoh ban rah ïa ki placard bad ki Banner ryngkat ki jingthoh ba ki pyrshah halor ka jingdih ne bam duma kaba long ka jingma na ka bynta ka koit ka khiah jong u briew.
Haba ïaid paidbah ha surokbah National Highway-6 ha Ri Bhoi, ki samla pule ki la pyrta bad phah ïa ka khubor sha ki paidbah ba ki dei ban kiar na ka jingdih ne bam duma bad ki la khot la wer ruh na baroh ki liang ban ïa trei lang na ka bynta ban sangeh ïa ki jingmlien ba sniew ha kaba bam ne dih duma.
Hadien ka jingïaid paidbah, ki la pynlong sa ïa kata ka Signature Campaign ba la shim bynta naduh ki samla pule, ki nonghikai bad kynthup ruh ki riew paidbah, ha kaba ka jingthmu jong kane ka signature campaign ka long ban pan ka jingkyrshan na ki paidbah halor ka jingthmu ban ïaleh pyrshah na ki jingdih ba sniew kiba ktah na u duma.
Na ka liang ki nongïalam ka NSS Unit, ka Ri Bhoi College, ha kane ka sngi ki la pynpaw ka jingkmen halor ka jingwan shim bynta naduh ki samla pule, ki noinghikai bad kumjuh ruh ki paidbah kiba la ai ka jingkyrshan ha kane ka sngi na ka bynta ka thong ban ïaleh pyrshah ïa ka jingmlien ban bam ne dih duma kaba long shisha ka jingma ïa ka koit ka khiah jong ki paidbah.
