Da ka jing riewblei shim bynta ki paid riewngeit ha ka Proseshon Maria ha Iing Mane Bah

Shillong, Jymmang 29 : Sa shisien pat ki paidriewngeit jong ka Balang Katholik khamtam eh kito kiba hap ha ka Cathedral Parish, Laitumkhrah ki la mih paidbah ban shim bynta da ka jingriewblei ha ka Proseshon Maria kaba 100 kaba long ha kane ka sngi U Blei.
Kane kadei ruh ka sien kaba nyngkong hadien ar snem hadien ba wan ka khlam COVID ba ki paidriewngeit ki ïoh ban shim bynta biang ha ka proseshon kaba ki ju ïoh ban shim bynta man la u snem.
Ha kane ka jingïaid Proseshon Maria, ki paidbah kiba bun ki la wan ban shimbynta shitrhem ha ryngkat ka jingdonlang u Fr. Jimmy Marngar uba dei u Chancellor ka Shillong Archdiocese, u Fr. Bernard Laloo, Parish Priest, Fr. Gerald Khongjee, Fr. Felix Lyngkhoi, ki sister na Little Flower Convent, na St. Mary’s Convent, na Peachland, ki paid riewngeit ka balang na Garo Community bad kiwei kiba wan shimbynta da ka jingshitrhem.
Ka jingïaid proseshon ka la sdang na phyllaw jong ka ïingmane, ter ter haduh Police Point bad la pynkut ha phyllaw jong ka Grotto hakhmat jong ka Calvary.
Hadien ka Proseshon, la ïoh ïa ka jingkren kiba sngewtynnad halor ka jingim jong ka Maria bad u Jisu Khrist ha ryngkat bad ka sneng ka kyntu na u Fr. Jimmy Marngar bad hadien kane la pynkut ïa kane ka sngi da ka Jingmane Sakrament bad la ai jingkyrkhu da ka Sakrament Bakhuid tam ka Duwan da u Fr. Jimmy Marngar.