Shillong, Nailar 19: Hadien ba ka Shillong Lajong FC ka la jam sha ka wat ïakhun Quarter Final ha kane ka IndianOil Durand Cup kaba 133rd , na ka liang jong ka klob kam lah khlem da ai khublei ïa ki nongkyrshan kiba la pynshit pynshngaiñ bad kiba la ai mynsiem ïa ka kynhun naduh ka jingïalehkai ba sdang na ka Group-F haduh kaba kut pyrshah ïa ka FC Goa ha ka Sngi Saitjaiñ jong ka taïew ba ladep.
Haba kren sha ki lad pathai khubor ha ka Lah Sngi U Blei (19 tarik Nailar) kane klob lyngba u Bah Seibor Sana (Club Advisor) ka la pynpaw ïa ka jingsngewnguh ïa ka Sorkar kaba la shimkhia ban pynurlong ïa ka jingangnud jong ka nongbah Shillong ban ïoh pynlong ïa kane ka lympung kaba la rim tam jong ka dewbah Asia.
“Khlem ka jingtrei shitom bad jingshimkhia jong ka Sorkar Ngi sngewthuh ba kane ka lympung kan nym lah ban wan ha kane ka nongbah, nangta Ngi ai khublei ruh ïa ki nongkyrshan kiba la wan sakhi ïa baroh lai tylli ki jingïakhun ba ladep” la ong u Bah Seibor.
U la bynrap ba da ka jingtrei shitom jong ka klob ryngkat ka jingai mynsiem jong ki nongkyrshan ka kynhun ka la jop ar tylli ki jingïakhun bad ïakhaid kawei pyrshah ïa ka FC Goa. Shuh shuh, ka klob ka ai khublei ïa ki Coaching Staff hapoh ka jingïalam jong u Jose Hevia kum u Head Coach kiba la ïasnohktilang ban saiñdur ïa ka kynhun bad ban btin lynti haduh ka quarter final ha kane ka Durand Cup 2024.
Ka Shillong Lajong FC kan sa aireng pyrshah ïa ka Emami East Bengal FC ha ka Quarter final kaba ar ha ka 21 tarik (Sngi Balang) por 7 baje janmiet, ha JN Stadium, Polo, bad na ka liang jong ka klob ka la ïawer ïa ki nongkyrshan ban ïa mih paidbah ha katei ka jan miet ban ai ka jingkyrshan kaba pura ïa ka kynhun da ka jingkyrmen ba kan jam sha ki wat ïakhun ba shakhmat ha kane ka lympung.
Kumban shu kdew, ka nongbah Shillong ka la dei ban ïoh pynlong tang hynriew tylli ki jingïakhun na ka Group F, bad la pynkhreh ïa ar tylli ki quarterfinal ban long ha Kolkata bad mar kawei ha Kokrajhar bad ha Jamshedpur. Hynrei, ka jingbym long shngaiñ ka nongbah ha West Bengal namar ka jingjia ba shah lehbeijot bad shah pynïap kawei ka doctor kaba la pynkhihwin ïa ka nongbah bad ka jingïalehkai na ka Group A hapdeng ka Mohun Bagan bad ka East Bengal la hap ban pynsangeh. Ha kaba ïadei bad kane, ka jingïakhun hapdeng ka Lajong pyrshah ïa ka East Bengal la pynkynriah noh ha Shillong.
Ka Lajong, ka lahduh jong ka Group F, kan ïatynjuhbor ha ka sien ba nyngkong pyrshah ïa ka East Bengal (runners-up na ka Group A) ha ki kyrdan ïalehkai ba la rangbah naduh u snem 2019 ba ki la ïakynduh khadduh ha ka lympung I-League.
