Ampati, Nailar, 17 : Ka South West Garo Hills District Chess Association ha ryngkat ka jingiatreilang bad ki bor synshar jong ka South West Garo Hills, ka la pynlong ia ka jingiakop ialehkai Chess ba ar sngi hapdeng ki skul ha Ampati Degree College. Ha kane ka jingïalehkai kaba la long ha ka sngi Thohdieng bad sngi Saitjaiñ, la ïohi ïa ka jingïashim bynta kaba shongshit na ki 44 ngut ki nongïalehkai Chess kiba mihkhmat ïa ki skul na South West Garo Hills district bad na Tura.
Ha kane ka lympung la pynlong ia lai tylli ki kyrdan kata ia kiba hapoh 10 snem, hapoh 12 snem, bad hapoh 16 snem, da ka thong ban ai lad ia ki samla pule bad ki samla donsap ban pyni ia ka sap ialehkai chess jong ki.
Ïa kane ka prokram la wan plie da u SDSEO u Emphul Marak kum u kongsan ha ka sngi nyngkong, katba u MDC ka Boldamgre u Stevie Marak u la ïadon lang ha ka sngi phainal bad sam ïa ki khusnam sha ki nongjop.
Ha ka jingïakhun Open Category, u Amaziah Gapesa Ch. Marak na Casarina Public School, Tura u la ioh ia ka nam jop da kaba kamai 6 poin. Ka Chongkimbea M Sangma ka St.Claret Higher Secondary School, Ampati ka la ioh ha ka kyrdan ba nyngkong na ka thup under 16 da kaba khur 5.5 poiñ, bud sa ka Yunkeycheah Ch. Marak na ka skul Boldamgre bad Jakgitelat Ch. Momin jong ka Don Bosco Higher Secondary School, Tura, ha ka kyrdan kaba ar bad kaba lai.
Ha ka kyrdan Under 12, u Baiyangsrang Sangma jong ka Casarina Public School, Tura u la ioh ban khur ia ka kyrdan kaba nyngkong da kaba khur 6 point. Ka Adora K Marak jong ka skul Sherwood, Tura bad ka Abrin M Sangma jong ka St.Marys School Ghatgre ki la ioh ban khur ia ka kyrdan kaba ar bad kaba lai.
Ha ka kyrdan Under 10 pat ia ka nam lahduh la ioh da ka Aesara Ringmitelachi Ch. Momin jong ka Soter School, Tura da kaba khur 5 point. Ka Takimra Sangma na ka Casarina Public School, Tura bad ka Ansame Marak ka Sun Town English School ki la ioh ban rah ia ka kyrdan kaba ar bad kaba lai.
Kane ka lympung ka la long kaba jop bad pynkmen ia ki nongshim bynta namar ka long kum ka kabu ksiar na bynta jong ki ban pyni ia ka sap ka talen kaba ki don.
