Yn ïai buddien ki Sengbhalang halor ka jingshah pynïap u Bah Cherish

Shillong, Nailar 13: “Haduh mynta u Bah Cherishterfield Thangkhiew u General Secretary barim ka HNLC um pat ïoh ïa ka jingbishar kaba hok bad ngi kum ka seng ki kyntu ïa ki paradoh para snam ba ki dei ban mih shakhmat ban pyni ba kum kine kiei kiei kim dei ban wanjia bad kum ka seng ka pynpaw ruh ka jingsngewkhia ba ka jingshah shim noh ka jingim jong u hadien 3 snem mynshwa ha Mawlai Konton Massar haduh mynta um pat ïoh ka jingbishar kaba hok,” ong u Vice President ka KSU u Bah Biangbor Paliar haba kren sha ki lad pathai khubor.
U la ong ba dei na kane ka daw ba na ka liang jong ki 3 seng kaba kynthup ïa ka KSU Mawlai Circle, ka FKJGP Mawlai Circle bad ka HNYF Mawlai Circle ba la pynlong ba kin mih shakhmat ban rakhe ïa kane ka sngi lyngkhuh sngi ïap ba 3 snem jong u Bah Cherishterfield Thangkhiew.
U Vice President ka seng KSU u la ong ba kum ka seng ka pynpaw ïa ka jingsngewsih kaba jur ha kaba ïadei bad kane ka jingjia bad watla kane ka kam ka dang sah hapoh ka ïingbishar hynrei na ka liang jong ka seng kan ïai buddien ha kaba ïadei bad kane ka jingjia.