Palat 30 ngut ki nongshong shnong ka jylla kin ïoh shim bynta ha ka Sngi laitluid ka Ri ha Delhi

Shillong, Nailar 13: Palat 28 ngut ki briew, ha ryngkat ki bahaïing jong ki, na Meghalaya kin ïashim bynta kum ki nongshah khot sngewbha ha ka jingrakhe ïa ka lyngkhuh sngi ïoh jinglaitluid kaba 78 ha New Delhi ha ka 15 tarik u Nailar, 2024.
Ka Sorkar India ka la khot sngewbha ïa 6,000 ngut ki briew na kylleng ka ri ban ïashim bynta ha kane ka jingrakhe hapoh ka phang Viksit Bharat. Ha ryngkat kine ki nongshah khot sngewbha, ki don 28 ngut ki briew na Meghalaya kiba wan na ka jinglong jingman bapher bapher, ba kynthup lang ruh ïa ki longkmie, ki samla bad ki nongmihkhmat na ka NITI Aayog bad Panchayat Raj.
Ki briew ba la shah khot sngewbha ki la ai ka jingsngewnguh ha kaba ïadei bad kane ka jingshah khot ha katei ka sngi.
Ka Kong Brotibon Mukhim, nongtrei ASHA, ka la pynpaw ïa ka jing sngewnguh da kaba ong, “Nga sngewnguh shisha ïa ka Sorkar kaba la jied ïa nga ban ïashim bynta ha ka jingrakhe ïa ka lyngkhuh sngi ïoh laitluid. Ka khubor jong nga ka long kaba suk ban sngewthuh, Long kiba trei shitom ha ka kam ba phi trei, long kiba skhem jingmut bad kiba ïaishah bad burom ïa ka kam ba phi trei.”
Kumjuh, ka Kong Balalupa Mawlong na ka tnad Panchayati Raj ka la ong, “Kum ka longkmie bad ka nongshong shnong jong ka India, nga pynshlur ïa baroh ban ïashim bynta ha kane ka jingrakhe bad burom ïa ka sngi ïoh laitluid kaba dei ka sngi kaba kyrpang na ka bynta ka ri bad ki briew jong ka kiba la ïoh ïa ka jinglaitluid na ka jingsynshar ki mynder.
“Man u briew jong ka ri u don ka kamram ban rakhe bad burom ïa ka ri ba ngi sah. Jai Hind!” Ka la ai khublei ruh ïa baroh na ka bynta ka sngi ïoh jinglaitluid.
Na ki khynnah, ka Laaibynta Mylliem, kaba pule ha ka Class 5 ha J.S. Memorial LP School ha Laitlyngkot, ka la ong ba ka sngew shongshit ban ïoh leit shabar ka jylla da kaba bynrap, “Nga sngew ïoh burom bad nga dap da ka jingkmen ban ïashim bynta ha ka jingrakhe ïa kane ka sngi.”
“Nga ap khmih lynti ban ïashim bynta bad nga duwai ba kane ka sngi kan pynkynmaw ïa ngi shaphang ka jingieid, ka jingkmen bad ka shongsuk shongsaiñ ba ngi dei ban don na ka bynta baroh ban tei ïa ka India kaba kham bha. Jai Hind,” ka la ong.
Katba u Bah Sanky Syih, u Assistant Teacher ha Khliehriat Higher Secondary School, u la ai jingsngewnguh ïa ka Prerana Utsav programme namar dei lyngba kane ba u bad ki khynnah pule ka East Jaiñtia Hills District, ki la ïoh ïa ka lad ban ïashim bynta ha kane ka jingrakhe.
U la ong ba u khmih lynti bha ïa kane bad u la ong, “Nga ai jingsngewnguh kyrpang ïa ki Principal jong ka Nodal School Jawahar Navodaya Vidyalaya Rymbai bad ka Khliehriat Higher Secondary School kiba la ïalam lynti ïa ngi.”
“Ka dei ka bok ïa nga bad ki khynnah pule ban ïoh ïashim bynta ha kane ka jingrakhe kaba don jingmut bha. Nga sngewkmen ban ïashim bynta ha kane ka prokram kaba khraw bad nga khmih lynti ban ïashim bynta ha ka da ka mynsiem kaba kmen,” u la ong.
Ka Kong Merilyn Nongrum, Secretary ka Seng Iakyntiewlang SHG na Umling C&RD Block, ka la kdew sha ka jingkongsan jong kane ka sngi ïa ka bad ka shnong jong ka bad ka la ai jingsngewnguh ïa ka Sorkar Jylla kaba la jied ïa ka ban sakhi ïa ka lyngkhuh ïoh jinglaitluid kaba 78 ha New Delhi, sha kaba kan poi ha ka sien kaba nyngkong ha ka jingim jong ka.
Ka la ong ba kane ka dei ka kabu ksiar ïa ka ban sakhi ïa kiei kiei kiba thymmai bad ruh ki jinghikai kiba ka lah ban wanrah biang ban ïasam bad ki nongshong shnong.
“Ka jinglaitluid ka dei ka lad ban pyrkhat kylluid jingmut, leh ïa kaba ngi kwah, bad don ka jingthrang ban jam shaphrang ha ka jingim. Ka jinglaitluid ka dei ka lad ban leh lut baroh dalade khlem da shaniah ha kiwei bad ka bor ban kyrshan bad ïeng ha la ki jong ki kjat,” ka la ong.
“Nga sngew donburom ban long shibynta ka SHG bad VO ha ka shnong Harlibagan kum ka Secretary jong ka Ïakyntiewlang SHG bad ka VO Ïasnohktilang. Ka jingdon jong nga ka ai jingkyrmen bad ka plié ka lad ïa ki longkmie ha ka shnong ba kin ïoh jingtip namar bun na ki kim nang ban thoh ban pule.
Ha kaba ïadei bad ka kam, ka la ong ba ki ju pynlong ïa ki jingpynkhuid shnong man ka por, da kaba khot lang ïa baroh ki dkhot ka SHG ban ïashim bynta. Ngi ïarap ruh ïa kito kiba don jingshitom ha shnong.
“Ngi pynlong jingïalang arsien shi taïew ha kaba ngi ïalumlang ban ïamir jingmut bad ai jingïarap ïa ki longkmie kiba shem jingeh. Shuh shuh, ngi la pyntreikam ïa ki skhim kum ka jinglum ïa ka um slap bad ka jingsdang ïa ki kper thung jhur ha ki ïing jong ki briew,” ka la ong.
Ha ka jingbatai shaphang ka jingieid ri, u Rikimbath S Marak, uba pule ha St Francis De Sales Higher Secondary School ha South Garo Hills u la ong, “Nga sngew donbok bha ban shah jied kum u nongshah khot kyrpang na Meghalaya. Kane ka dei ka kabu kaba wan shisien ha ka jingim bad nga khmih lynti ban ïashim bynta da kaba pyni katno nga ieid ïa ka ri. Jai Hind.”
Kumjuh, ka Tinamuri Marak na North Garo Hills, Resubelpara na ka NITI Aayog ka la ong, “Ngi long kiba don ïa ka hok ban kren bad ban pynïohsngew, ka hok ba ki riewshlur ki la ïakhun ban ïoh.”
“To, ngin burom ïa ka jinglenlade jong ki bad tyngkai ïa ka jinglaitluid ba ngi ïoh mynta. Jai Hind.”
Lah ban ong ba ïa ki jingkhot ïa kine kiba la shah khot kyrpang la phah da ki Tnad Sorkar lyngba ka Tnad Kam Ïada Ri.