Shillong, Nailar, 08: Ka Khasi Students Union (KSU) ka la dawa ïa ka Sorkar India bad ïa ka Sorkar Jylla ba kim dei ban ai jaka rieh tngen ïa ki phetwir na ka ri Bangladesh kiba lah ban wan rung shapoh ki jylla jong ka thaiñ Shatei Lammihngi bad ha ka jylla Meghalaya na ka jingïaumsnam kaba dang bteng ha ka ri Bangladesh.
“Ha ka jingshisha ngi la kren bad ka Sorkar naduh ki phew snem kiba mynshwa ban don kita ki ai ban ïada. Mynta syndet syndet ka la wan jia ka thma pohiing ngi lah ban ong ha ka ri Bangladesh bad ka jingïap briew ka long kaba lah shyrkhei bad ka sdang na ki samla halor ka bhah thungkam thungjam,” u la ong ha ka jingïakren bad ki lad pathai khubor ha ka sngi Palei.
“Na ka liang jong ka seng ngi long kiba la peitngor bad ngi la bthah sha baroh ki shnat treikam kiba don ha ki shnong khappud ba kin long kiba peitngor. Ka KSU West Jaiñtia Hills District Unit hynnin ka sngi ka la leit sha ka thaiñ Dawki bad sha kiwei kiwei ki shnong khappud ban ïakynduh ïa ki nongïalam shnong bad ban ai ïa ka kti ka mon ka kti ka diang,” u la ong.
“Ngin dang ïai peitngor kaei ka ban jia bad kaei ka ban long, bad ym tang katta, ka NESO, ba ka KSU ruh ka don lang, ka la pynher ïa ka shithi sha u Myntri Rangbahduh ka ri u Narendra Modi bad sha u Myntri ka tnat Kam Pohing u Amit Shah ba kim dei ban ai jaka rieh ïa ki phetwir na ka ri Bangladesh ha kane ka thaiñ Shatei Lammihngi,” u la bynrap.
“Kan ym kut tang katta, ha kine ki sngi ki ban sa wan ngin sa ïai long kita ki nongpeit ngor ha manla ki shnong ki thaw ban ym ailad ïa ki phetwir ban pynlong ïa ka Bri u Hynñiewtrep kum ka jaka rieh tngen haba ki nong Bangladesh ki phet na ka ri lajong,” u la ong shuh shuh.
