Lyngba ka CM Farm+ yn kyrshan pisa ka Sorkar ïa ki nongrep ban pynmih ïa ki jingthung ba remdor

Nongpoh, Nailar 07: Da ka jingthmu ban pyniar ïa ki jaka thung bad ka jingpynmih ïa ki jingthung ba rem dor bad kiba neh slem, kum u Sohmarit, sohtrun, Cinnamon, Large Cardamom, Cashew, Coffee bad Cocoa namar ka jinglong jingman jong ka suin bneng ka long kaba paka na ka bynta kitei ki jingthung, na ka liang ka sorkar lyngb ka CM Farm+ ka don ka jingangnud ban kyrshan pisa ïa ki nongrep haka jylla bad kumjuh ruh ban pynioh ïa ki symbai haka por kaba biang.
Na ka liang u Myntri Rangbah ka jylla u Conrad K Sangma mynta ka sngi u la wan ban plie paidbah ïa katei ka prokram ha Ri-Bhoi kaba long ruh ka jingkyrkhu kaba khraw ïa ki nongrep ban nang pyniar ïa ka jingthung ïa kitei ki mar rep ba rem dor haka thaiñ Ri-Bhoi ha kaba ka jingrep ïa kitei ki jingthung ba remdor kiba lah ban kyntiew ïa ka ioh ka kot ki paidbah.
Ha katei ka sngi la wan ruh ban don lang naduh ka kong Ampareen Lyngdoh Myntri ka tnad ka rep ka riang, Bah Mayral Born Syiem MLA ka Nongpoh, A Baranwal Deputy Commissioner ka Ri-Bhoi bad ki ophisar na ka tnad ka rep ka riang.
Haba kren ha katei ka sngi na ka liang u Conrad K Sangma u la ong ba ka jingthong bad ka jingthmu jong ka sorkar lyngba ka CM Farm+ ka long ban pynkiew ïa ka kamai jong ki nongrep bad ban pynbha shuh shuh ïa ka jingtrei ka jong ki
Ha Megha laya, palat 70% ki paidbah ki dei ki nongrep, ka jingkyrshan ïa ka rep ka long kaba donkam eh bad ki prokram bapher bapher jong ka sorkar ki la pynmyntoi ïa palat 1,50,000 tylli ki longïing lyngba ki prokram kum ka Turmeric Mission, Ginger Mission, Floriculture Mission, Mushroom Mission, bad Spice Mission. Kine ki jingtrei ki la iarap ia ki nongrep ban ioh dor ba kham bha da kaba ai jingmyntoi bad pynbha ia ki mar rep jong ki.
Ha kaba ïadei bad ka CM FARM+ ka sorkar ka thmu ban rep kumba 10 hajar hectare ka jaka ha kaba sdang bad ban pynlut kumba 300 klur tyngka haki jingthung kum u Sohmarit, sohtrun, Cinnamon, Large Cardamom, Cashew, Coffee bad Cocoa.
Kane ka prokram ba kyrpang ka thmu ban pyndap bad kyntiew ïa ki nongrepbad ban pynbiang ïa ka jingslem ban ioh symbai bad kane kan pynmyntoi ïa ki nongrep shibun namar kitei ki jingthung ki dei ki rem ka dor bad lah ruh ban sha lan shabar
U la ong ruh ha kaba sdang, ngin pyrshang shuwa kumba 10,000-hectare ka jaka ha ki lai haduh san snem, bad lada ka jingmyntoi ka kiew, ngin pynkhlaiñ ïa kane ka prokram namar ka jingthmu hi jong ka sorkar ka long ban pynkiew ïa ka kamai ki nongrep bad ban pyniar shuh shuh ka jaka thung ïa kitei ki mar rep sha ki shnong bapher bapher.
Ha katei ka sngi la ioh ruh ban sam ïa ki symbai Large Cardamom sha ki paidbah jong ki shnong bapher bapher ha Ri-Bhoi ha kaba na ka liang u Myntri Rangbah u la pynpaw ka jingsngewkmen kaba khraw bad khmih lynti ba katei ka prokram kan long kaba jop.