Shillong, Nailar 06: U MP ka Shillong, u Dr. Ricky AJ Synkon, ha ka janmiet sngi Baar u la ïakynduh ïa u Myntri ka tnat Kam Pohïing ka Sorkar Pdeng u Amit Shah ban ïakren halor ka jingma ïa ka jylla Meghalaya bad ïa ka ri India hi baroh kawei namar ka jingsynjor ka synshar khadar ha Bangladesh.
U MP u la kyntu ïa u Myntri ban pynkhlaiñ ïa ka jingpahara ha ki khappud jong ka jylla bad ka Bangladesh ban ïada ïa ka jingwan rungtuh ki briew na Bangladesh sha Meghalaya kaba long ka jingma ïa ki trai ri trai muluk hangne.
Na ka liang u Myntri ka sorkar pdeng u la kular ban peit ba ka jingpahara ha khappud kan long kaba khlaiñ ban ïada ïa ka jingwan rung beaiñ ki briew na shiliang khappud.
Ha kajuh ka por u MP u la ïakren ruh ïa ka jingjur ki kam dawa pisa beaiñ ha ki National Highway jong ka jylla kaba la ju ïai jia na ka por sha ka por bad kaba long ruh ka jingma ïa ki briew kiba ïaid ba ïeng lyngba kane ka surok.
