Nongpoh, Nailar 06: Ka jingther u lapbah bala neh bun kynta hynnin ka Lah Sngi u Blei ka la wanrah ka jingshlei um bad ka jingtwa khyndew ha kylleng ki jaka jong ka dong Ri-Bhoi bad ka Jirang Constituency kadei kawei nakiba la shah ktah jur, haduh ba ki skul haka thaiñ khappud bad ka Assam kila hap ban ai shuti noh ïaki khynnah namar ka jingdap um ki kamra klas.
Kiba bun naki paidbah ha kylleng ki jaka kila hap ban mad ka jingsyrtok naka jingrung ka um slap bad ki khyndew sha ki kamra jong ki iing ki sem kaba la wanrah ka jingiam kthang jong ki paidbah.
Halor katei ka jingeh bala mad da ki skul bad ki paidbah naka liang u Bah Sosthenes Sohtun MLA ka Jirang mynta ka sngi u la leit ban jurip ïa kitei ki jaka haka jingdonlang ki nongmihkhmat naka ophis u BDO, ban lum jingkheiñ ïaka jingduhnong bad ka jingshah ktah jong ki skul bad ki paidbah.
Haba kren sha ki lad pathai khubor naka liang u MLA ka Jirang u la pynpaw ka jingsngewkhia halor katei ka jingjia bad shah ktah haka mariang namar bun naki skul bad ki longiing haki shnong bapher bapher ba hap ha Jirang Constituency kila shah ktah kaba la wanrah ka jingduhnong bad ka jingsyrtok ïaki paidbah.
Na ka liang u MLA ka Jirang u la dep ruh ban ïakren bad u DC ka Ri-Bhoi halor katei ka jingeh ba ki paidbah ki ïakynduh bad mynta ka sngi ha ka jingleit jurip la leit ruh naduh u Gram Sevak ban lum jingkheiñ ïaki jinglut bad ka jingshah ktah jong ki paidbah naka jingshlei um bad twa khyndew.
Shuh shuh u MLA u la kyrpad ruh naka sorkar ba ka dei ban pynkloi ki lad jingiarap sha kitei ki lanot kiba la mad jingeh lyngba ka Relief Fund.
