Shillong, Nailar 06: U MDC ka Pynthorumkhrah bad uba dei ruh u MLA barim ka Congress na ka Mawsynram bad uba long mynta u Deputy CEM ka KHADC u Bah P N Syiem u la ong ba u la ïoh ka jingtip ba ki don ki 3 ngut ki MLA ka seng kiba thmu ban pynïasoh bad ka seng NPP bad halor kane u la ong ba um pat shym la ïoh ban ïakren bad ki bad ha kine ki kyndiat sngi yn sa lah ban ïakren la ka long kaba shisha ne ka bym shisha.
“Haba kam don ka jingpynshai kaba mut ba kam don satia kata ka jingphet seng bad ha ka jingsngew jong ki kam da don eh kata kaba ki kwah ban pynïasoh hynrei namar ba ki ong ba ki ong ba kin sa pynïasoh shen kumta ngin ap ïa kata ka rai ba kin pynïasoh shen bad kumba ka long mynta ngi dang sah hi baroh 4 ngut ki MLA bad kam don kano kano kaba pynbor ïa ngi ban leh kumta. Ki khubor kiba la mih ha ki kotkhubor ne ki Social Media ngam lah ban ong ba haduh katno ka long kaba shisha hynrei namarba ki ong ba shen kin sa mih noh te ngin ap ïa kata ka shen,” ong u Bah PN Syiem.
U la ong ruh ba haduh mynta kam shym la don kano kano ka jingïapher jingmut watba ba la rem ha ka ilekshon MP ruh hynrei ka seng ka shim ïa ka jingkitkhlieh lang bad kumba ka long mynta ka dang don ka jingïatreilang bad kam don kano kano ka jingïapait ïa pra bad ka jingïajan paralok bad no bad no kam ktah ïa ka seng namar ka jingïajan paralok ka long kaba donkam namar hap ban ïajan bad kino kino bad ka jingkam ba ki don ki paralok Congress kiba ïajan bad ka NPP kin mih noh na ka seng ka long kaba ym sngewïahab satia hynrei hap pat ban ïeng ha la ka jong ka nongrim jong ka seng ha kaba ïadei bad ka synshar ka khaddar.
