Tura, Jymmang 28 : U Symbud Myntri Rangbah ka jylla u bah Prestone Tynsong u la ïathuh ba ka sorkar kan sa tei noh shen ïa ki Mini Secretariat ha Tura bad Jowai bad hadien kata ha man la ki nongbah jong ki District bad lehse wat shaduh ki nongbah jongki Sub Division ruh, namar ka jingthmu ka long ban buh lang ïa baroh ki ophis ha kajuh ka jaka ban pynsuk ïa ki paidbah haba ki leit donkam sha ki ophis sorkar bapher bapher.
ïa kane u la pynpaw haba kren kum u kongsan ha ka jingplie ïa ka ophis ba thymmai jongka Housing bad MIG mynta ka sngi ha Dakopgre, Tura. Haba kren ha kane ka jingïalang u la ong ba ka sorkar ka pyrshang katba lah ban pynurlong ïa ki jingangnud bad jingthrang jongki paidbah na ka bynta ban kyntiew ïa ka roi ka par. Dei na kane ka daw ba ka sorkar hapoh ka jingïalam u Myntri Rangbah u Conrad K Sangma lem bad ki myntri sorkar ka la shim ïa ka rai ban don ki mini secretariat ha man la ki district ban pynsuk bad pynjan ïa ka synshar khadar sha ki paidbah da kaba kim donkam shuh ban wan shaduh sha nongbah Shillong hynrei tang ha kitei ki mini secretariat ruh ki la lah ban pyndep ïa ki kam ki jam jongki.
“ Kum ka jingsdang namar hapdeng ka jinghiran pisa yn sdang shwa na Tura bad Jowai bad hadien kata yn sa nang tei ha man la ki district” ong u bah Tynsong.
Namar ka jingduna jaka sah ïa ki nongtrei sorkar ha ki district kumba la pyntip da ki deputy commissioner, u symbud myntri rangbah ula ïathuh ba ka sorkar kan pyrshang ban thaw bun ki Middle Income Group bad Low Income Group Housing Complex khnang ban pynïoh jaka sah ïa ki nogntrei sorkar.U la ïathuh ruh ba ka sorkar ka dang pyntreikam ïakiba bun ki surok, ki projek pynroi pynpar ha kiba bun ki jaka hapoh ka jylla.
Na ka liang u Adviser jong u Myntri Rangbah u MLA ka North Tura u Thomas A Sangma ul a pynpaw ka jingsngewkmen ïa u myntri rangbah bad ia u symbud myntri rangbah kiba la shim khia ban pynurlong ïa kane ka ophis bad u kyrmen ba kane ka ophis kan ai ka jingshakri hok sha ki paidbah.
Kiwei kiwei kiba la ai jingkren ki long u DC Swapnil Tembe, u Director ka Housing u David D Sangma bad la ïadon lang ruh ki ophisar ha kane ka jingïalang.
