Shillong, Naitung 31 : Ka Sorkar Jylla ka la pynbna ba baroh ki skul kiba hap ha u pud jong ka Shillong Municipal kin ïoh shuti ha ka 02tarik mynta u bnai kaba dei ka sngi ba sdang ka jingplie pyrda ia ka lympung ialehkai Durand Cup ha madan JN Stadium, Polo.
Katkum ka jingpynbna ba la phah da u Director ka School Education & Literacy, u Swapnil Tembe la ong ba ka rai ban ai shuti kadei hadien ba ki la ïoh pdiang ia ka shithi na ka tnad Sports ba kan don kajingplie pyrda ia ka Durand Cup ha katei ka sngi kumta khlempep kan don ka jingdheng kali kaba jur.
Dei halor kane ba ka tnad Pule Puthi ka la shim ia ka rai ban pynbna noh da ka shuti ha kito ki skul ba hap ha u pud jong ka Shillong Municipal khnang ba ki khynnah skul kin ym kynduh jingeh.
