Shillong, Jymmang 27: Ka Mawlai SC ka la long ka lahduh napdeng ki 12 tylli ki team ha ka lympung ïalehkai ki kynthei kaba la tip kum ka Women Football League 2021-22 ba pynïaid da ka Shillong Sports Association (SSA).
Ka Mawlai SC ka la jop nam lahduh da kaba pynliem da 2-1 kol pyrshah ïa ka Laitkor SC ha ka jingïakhun final kaba long ha ka sngi Thohdieng ha madan MFA Third Ground, Polo, Shillong.
Ka Mawlai SC kaba long ka lahduh ka la khur ïa ka song pisa kaba 30,000 tyngka ha ryngkat ka trophy katba ka Laitkor SC kaba wan ba ar ha ïoh 18,000 tyngka.
Haba phai sha ka jingïakhun final hapdeng kine ki ar tylli ki team, ka jingïakhun ka long kaba shongshit bad ïakhaid bha. Ka jingïakhun jong kine ki ar tylli ki team ka la ïaryngkat bad ki shynrang naduh ka rukom pashat bad pyllait bol.
Baroh ar tylli ki team ki la trei shitom da ka thong ban poi sha ka thong jong ka jingjop, hynrei haduh kaba kut jong ka kylla step bad kylla miet, ka jingïakhun ka la kut khlem da lah ban ïathep kol.
Kumta ïa ka jingïalehkai la ailad pat sa da ka extra time bad dei ka Mawlai SC kaba la ïoh ban pynkhih jar nyngkong lyngba ka Ibashisha Khongwet ha ka minit ba 65. Lyngba kane ka shi kol ka jingïakhun ka la nang ïathnem ha baroh arliang.
Bad tang mar ïasdang biang ka jingïalehkai, ka Bahunlang Synrem ka la thep ïa ka kol kaba ar na bynta ka Mawlai SC ha ka minit 65+1 kaba la nang ai mynsiem shuh shuh ïa ka kynhun.
Ka jingïakhun ka la nang pynsmiej ïa baroh arliang, hadien ba ka Laitkor SC ka la ïoh ban pynphai shi kol lyngba ka Ribahunshisha Kharshiing kaba la thep ha ka minit ba 66. Namar ba ka por ka la lyngkot, ka Laitkor SC watla ka la ïakhun tyngeh ban pynphai sa ïa ka shi kol hynrei haduh kaba kut ka khlem lah shuh ban thep ha kaba ka Mawlai SC ka la pynliem bad khur ïa ka nam lahduh.
