Yn khmih bniah biang ka Health Deptt. ïa ka Bond Policy ban tehlakam jingduna doktor ha jylla

Shillong, Naitung 09: Ka sorkar jylla ka la rai ban khmihbniah biang ïa ka jingïateh kular ne ka bond policy khnang ban lah tehlakam ïa ka jingduna ki doktor ha ka jylla.
Ïa kane la ïathuh da ka Myntri ka tnat Health and Family Welfare ka Kong Ampareen Lyngdoh ha ka sngi baar hadien ka jingïalang bad ki nongmihkhmat ka Khasi Students’ Union (KSU), kiba la kyrpad ïa ka jingtuklar jong ka ban pynthikna ba kan don ka jingkhuid jingsuba ha kaba bhah ïa ki medical seat hapoh ka bhah ka jylla.
“Balei ba na ka snem sha ka snem, ka jingbhah ïa ki jingpule doktor ne medical seats la kyntiew na ka bynta ki samla pule ka Meghalaya bad balei ngi dang mad ïa kane ka jingduna bun ki doktor? Kumta ngin khmihbniah biang ïa kane ka bond (policy). Ngin phai dien biang ïa kine ki jingsngewkhia kiba donkam ban pynthikna ba ki doktor, kiba ïoh ka bhah na ka jylla Meghalaya kidei ban wanphai sha ka jylla Meghalaya,” ong ka kong Lyngdoh.
Ka la ong ba ka tnat ka dang ïakren bad ka law department ban khmih bniah bad ban phai dien biang ïa ka bond policy ban pynthikna ba kan don ka jingwanphai jong ki doktor bad ki samla pule ban shakri ïa ki nongshong shnong ka jylla Meghalaya.
“Ka la long kaba la slem bha ba ki doktor kiba la ïoh ka lad ban pule doktor na ka bhah ka jylla la ïohi ba kim shym la wanphai sha ka jylla bad mynta ba la ïohi ba ka la don ka jingïakhun na ka bynta ban applai ïa ki MBBS seat ka dei ban don ka jingkitkhlieh ba kan don ka jingwan phai ban shakri ïa ka jylla Meghalaya,” ka la bynrap.
Katkum ka jingïathuh ka Myntri ka la ong ba ka la don ka jingkyntiew ïa ki medical seat ba la ai bhah sha ka jylla Meghalaya, kaba la ïoh 94 seat ha u snem 2023.
“Ngi kyrmen ba kine ki seat kin bteng ban kyntiew ha kine ki snem ban wan,” ka la ong.
Ka myntri ha kawei ka liang ka la ong, “Ngi kyrmen ba ka court kan ai jingmynjur sha ka sorkar pdeng ban sdang noh ïa ka jingïasyllok halor ka NEET, ngi kyrmen ba ngin sa don ha ka jaka kaba bha ban kren halor ka jingai bhah sha ka jylla Meghalaya.”
Ka kong Lyngdoh ka la ong, “Ka personnel bad ka law ki dei ka bor ban ai jingmut bad jingkdew lynti ha kino kino ki line department namarba haduh mynta ka jingbhah ïa ki seat ka long katkum ka reservation policy. Kumta mynta ngi don ha ka jaka kaba biang ban pynthikna ïa ka jingjied bad ka jingbhah seat na ka bynta ki medical college kaba long katkum ka reservation policy, ba ngim dei ban pynkheiñ bad ba ngim dei ban pynduh jingkyrmen ïa kiba dei ban ïoh jingmyntoi ba ki dei ban ïoh na ka.”
“Kine ki dei ki jinglong jingman kiba kongsan bad ngim dei ban shim ka rai halade ngi dei ban ïoh ka jingbatai bad ki jingai jingmut kiba dei na ka personnel and law khnang ba ngin lah ban pyntreikam ïa kane ka lad na ka bynta ki samla pule kiba applai na ka bynta ki medical seat bad ki dei ban pynthikna ba kin ïaid katkum ki aiñ bad polisi jong ka jylla Meghalaya,” ka la ong.