Pan jingkyrshan pisa u AT Mondal na ka Sorkar Pdeng ha ka jingïalang ki Myntri Bording ka NE
Guwahati, Naitung 09: U Myntri ka tnat Bording ka sorkar jylla Meghalaya u Abu Taher Mondal u la shim bynta ha ka jingïalang ki Myntri ki tnat Bording kane ka thaiñ shatei lammihngi kaba la long ha Guwahati. Ïa kane ka jingïalang la pynïaid da u Myntri ka Sorkar Pdeng uba khmih ïa ka tnat Bording u Manohar Lal Khattar, bad ha ka jingïalang la ïasyllok halor ki kam kiba ïadei bad ki kam bording ne ka Power Generation, Transmission bad ka Distribution ha Meghalaya bad ki jylla kane ka thaiñ shatei lammihngi.
Ki heh ki haiñ kiba la shim bynta lang ha kane ka jingïalang ki long u Shashank Mishra, Joint Secretary, Distribution ka Ministry of Power (MoP), ka sorkar pdeng, u Jameer Uddin Ansari, Deputy Secretary ka Ministry of Power (MoP), u Sanjay Goyal, IAS, Commissioner and Secretary, Power Department, ka sorkar Meghalaya, u Ghanshyam Prasad, Chairperson ka Central Electricity Authority, Ministry of Power, u Vivek Kumar Devangan, CMD jong ka Rural Electrification Corporation (REC) Limited, u Rahul Dwivedi, ED, PMD, REC Limited, TSC Bosh, ED Admin REC Limited, u Shashank Mishra bad ki nongmihkhmat na PGCIL bad NHPC napdeng kiwei pat.
Ha ka jingïalang la wanrah ruh ïa ka mat jingïakren ban kyntiew ïa ki Pumped Storage Project ha Meghalaya kaba la wanrah da u Myntri ka tnat Bording ka jylla u Abu Taher Mondal. Na ka liang jong u, u la pan ka jingkyrshan na ka sorkar pdeng ban pynïoh jingïarap pisa na ka bynta ban ïarap kyntiew ïa ki PSP.
U la kren ruh halor ki kam ba ïadei bad ki jingïarap pisa ne ka Central Financial Assistance na ka bynta ki Hydro power project kiba rit ha ka jylla kiba la shah pynsangeh noh mynta ha ka Ministry.
U Myntri ka sorkar jylla u la kyrpad ruh ba ka DPR ba la aiti da ka Meghalaya Power Distribution Corporation Limited (MePDCL) na ka bynta ka Revamped Distribution Sector Scheme (RDSS) Phase II dei ban mynjur noh kham kloi katba lah. U la ïathuh ruh ha ki kam kiba sah ha ka jingbei tyngka na ka sorkar pdeng hapdeng ka Sanctioned Cost bad ka Discovered cost na ka bynta ka RDSS Phase I.
Ha kane ka jingïalang baroh ki point ba la pynpaw la shim khia da ki nongmihkhmat. Na ka liang u Sanjay Goyal, IAS, Commissioner and Secretary, haba kren u la pynpaw halor ki jingai ne sam bording sha manla ki thliew ïing bad ki jingdonkam ka jingbei tyngka katkum ki ïing ban ïa kaba mang halor ka jingdon ki thliew ïing ha kaba ïa kane la pdiang da ka Ministry of Power.