Shillong, Naitung 07: U MLA ka BJP u Bah Sanbor Shullai u la pynpaw ïa ka jingsngewkhia kaba jur halor ka jinglong jingman jong ka suk ka saiñ hapoh ka jylla khamtam eh ha kaba ïadei ba ka jingshah pynïap dusmon jong ki 4 ngut kaba la jia hapoh ka shnong Umpleng kaba hab hapoh ka East Jaiñtia Hills District, Meghalaya kaba pyni ba ka shongsuk shongsaiñ ha ka jylla ka la long kaba synjor.
Ha ka kyrwoh khubor u Bah Sanbor Shullai u la kyntu ïa ka sorkar jylla ba kam dei ban ailad bad kam dei hi ruh ban shah ïa kino kino ki jingshah pynbor. U la ong ba ïa ka sorkar la jied ba kan pynthikna ba ka aiñ ka dei ban treikam ha ka imlang sahlang bad kadei ban shim ïa kane ka jingkitkhlieh ban ïada ïa ki nongshong shnong.
U Bah Sanbor Shullai u la pynkynmaw ïa baroh ki nongshong shnong bad ki bor pynïaid ba mano mano kim lah ban long hajrong jong ka aiñ, bad ym don kiba lah ban shim ïa ka aiñ ha ki kti lajong. Kam don ruh ka daw kaba lah ban pynshisha ba lah ban pynïap ïa kino kino ki briew.
Na ka liang u MLA u la kyrpad ïa baroh ki nongshong shnong ban kiar ha kino kino ki kam ïaumsnam bad ba kidei ban aiti ïa kino kino ki kam bymman sha ki pulit, khnang ba ka hok ki nongshong shnong kan neh.
U la ong ba ha kane ka pyrthei ha kaba ka social media ka synshar, ka hamsaïa bad ki jingpynphriang khubor kiba thok ki ïaid bha tang da kaba shu click, kane kan pynkha ïa ka lad jong ka jingïaumsnam hapoh ka imlang sahlang bad kum kine ki jingjia bad ki khubor kiba thok kim long kiba la pdiang hapoh ka imlang sahlang.
Ha kajuh ka por u Bah Sanbor Shullai ula ïaroh ïa ki kam ba la trei da ki NGO kiba ïakhun pyrshah ïa ka jingsniew jong u drok bad u la ai ka jingkyrshan kaba ratbah ha kaba ïadei bad kane ka kam. Ha ka synshar paidbah baroh ki don ka hok ban pynpaw ïa ka sur hynrei ym don pat kiba lah ban ïoh ka laisen ban pynïap ne pynmynsaw ïano ïano ruh.
