Ym lah ban shu pdiang ruma ïa ki katto katne ki nongïalam na kiwei ki party: Congress

Shillong, Naitung 06 : U President ka Congress ha Meghalaya, Bah Vincent H Pala ha ka sngi Saitjaiñ u la ong ba na ka party ki kloi ban pdiang sngewbha ïa baroh ki nongïalam na kiwei ki party ban wan sha ka Congress tangba don pat katto katne ki nongïalam ba ki hap ban da bishar bniah shwa ban pdiang ba kin wan pynïasoh sha ka Congress.
Haba kren bad ki lad pathai khubor, u Bah Pala u la ong, “Ngi pdiang sngewbha ïa baroh ban rung sha ka party. Hynrei na ka bynta ki katto katne ki kyrdan nongïalam, ïa ka rai yn shim da ki heh jong ka seng shwa ban pdiang ïa ki.”
U Bah Pala u la ong ruh ba ka Congress kum ka Seng Kmie ka ailad ïa baroh ban sngew jan sngew trai ïa ka party hynrei mynta pat ki hap ban bud ïa ki kyndon ïa kino kino kiba kwah ban rung sha ka seng. “Ngim ong ba ki paidbah kim lah ban rung sha ka party hynrei don pat ka rukom treikam na bynta ki katto katne ki nongïalam ha kaba ka All India Congress Committee ruh ka hap ban tuklar lang ha shwa ban shim ïa ka rai ban pdiang ïa ki.”
Shwa kane, u President u ong ba don ki khep ba u Bah Ronnie Lyngdoh kum uwei na ki nongmihkhmat bad nongïalam ka party u sngew ba ki kwah ban pdiang ïa baroh hynrei don pat ki bynta kiba kum u Saleng kum u MP bad kum uwei na ki heh Congress u sngew ba kim lah ban pdiang. Kumta ha kum kine ki khep donkam ban hap da bishar bniah shwa ban shim ïa ka rai ba khatduh.
Tangba u ong pat ba don pat ki khep ba lada don ki nongïalam kum u Myntri Rangbah barim ne Myntri Sorkar kumjuh ki MLA lada ki kwah ban rung sha ka party ka don da kawei pat ka rukom treikam bad kane hi kan don da kawei pat ka rai.
Lah ban kdew hangne ba don ki nongïalam ka Congress kiba pynpaw ba ki long kiba kloi ban pdiang ïa ki nongïalam barim ka party kiba la phet noh sha kiwei ki party ba kin wan phai biang. Hynrei na ka liang u MP ba thymmai pat u la ong ba kim sngew tynnad ba ki katto katne ki nongïalam barim kin ïoh jaka biang ha ka party.