12 tylli ki rot poi ha pung ‘Syiem Aitnar’ ha ka sngi kut ka Behdieñkhlam ka Seiñ Raij, Jowai

Jowai, Naitung, 03: Ka Shad ñiam Behdieñkhlam kaba ju long shisien shisnem jong ka Seiñ Raij Jowai ha ka sngi Muchai) ka la poi noh sha kaba kut hapdeng ka jingiphuh iphieng ba la shim bynta ki khun ka Seiñ Raij Jowai ha ryngkat ka shad ka kmen bad ka put ka tem.
Ïa kane ka shad ñiam Behdieñkhlam kaba ki khot ka ‘saw sngi lai miet’ la pyndep ïa ki jinglehñiam naduh ka nguh ka dem, ka suit ka shor, ka jingpyndep ïa ka Siang ka Pha, ka jingleit rah ïa ka Symbood Khnong, ka Khnong Blai, ki Deiñkhlam, ka bam tyngkong, bad kiwei de ki kam ñiam kam rukom ba la pyndep da u Dolloi ka Elaka Jowai, u Langdoh, u Pator bad ki Waheh Wasan.
Baroh ki Rot kiba la wan pynpoi ha kane ka sngi pynkut hapoh ka Syiem Aitnar ki don haduh 12 tylli, ïa kiba la shna kyrpang da ki dong bapher bapher hapoh ka Kmai Raij kumjuh na ka Seiñ Ummulong, ka Seiñ Raij Shillong nalor kiwei de.
“Kine ki rot ki la ai ka khubor bapher bapher naduh ka bor jong ka spah kaba synshar ïa u briew, ki lad ban ïada ïa ka mei mariang ban lait na ki jingjaboh, ka jingdonkam ban ïoh ïa ka umbam umdih kaba khuid, ka jinghikai ba ym bit ban pom pathar ïa ki dieng ki siej bad kiwei de ki khubor jingsneng kyntu ïa ka imlang ka sahlang.
Ha kane ka sngi, la sakhi lang da u Myntri Rangbah ka jylla u Conrad K. Sangma, ki MLA ba kynthup ïa u Bah Paul Lyngdoh, Bah Shanbor Shullai, Bah Wailadmiki Shylla, Kong Santa Mary Shylla, ki MDC, u Deputy Commissioner ka West Jaiñtia Hills Bah B.S. Sohliya, u Superintendent of Police Bah C. Syrti, ki ophisar Sorkar ryngkat ka jingdonlang u President ka Seiñ Raij Jowai Bah H. Toi, u General Secretary Bah A. Sumer nalor kiwei de.
Ki nongïalam ka Seiñ Raij Jowai ki la pynpaw ka jingsngewnguh ïa baroh kiba don bynta ha kane ka lehñiam naduh basdang tad haduh bakut jong kane ka sngi, ha kaba la lah ban pyndep ïa ki ñiam ki dustur jong u longshwa manshwa.
Haba phai sha ka lehñiam ba khadduh jong kane ka Behdieñkhlam mynta u snem naduh ka por mynstep ka la don ka Bam Tyngkong ha ïing Langdoh, ka kynting khnong ka Loompyrdi ha ïung Langdoh, ka Sympat ïung, katba haka por nongphai sngi kaba dei ka bynta ba kongsan jong ka lehñiam la pynhiar ïa ka Deiñkhlam, ka Kymbood Khnong, ka Khnong Blai bad ki rong ki rup kiba don 12 tylli la pynpoi ha pung ka Syiem Aitnar da ka jingsakhi lang jong ki hajar ngut ki nongwan peitkai kiba dei na kylleng ka Ri Khasi Jaiñtia.
U Conrad K. Sangma haba kren ha kane ka sngi u la pynpaw ka jingsngewkmen ban wan sakhi lang ïa kane ka shad Behdieñkhlam haka sien kaba lai, ula pynsngew ruh ba ka jylla Megha laya ka long kaba riewspah bha ha ka riti ka dustur jong u barim bajah.
U la pyntip ïa ka Iawmusiang Shopping Complex kaba la sah teng da ki phew snem, na ka liang ka Sorkar ka la dep ban sanction ïa ka pisa kaba 26 klur bad shen tang ha kine ki kyndiat bnai yn sdang noh ban pyntrei noh ïa ka. Shuh shuh ula pyntip da ka jingïarap kylluid jong ka Seiñ Raij Jowai ban ai ïa ka jaka ka sorkar shen kan sa tei ïa ka Parking Lok ha Jowai bad ynda la dep yn aiti noh ha ka Seiñraij Jowai ban pynïaid.