Shillong, Naitung 02: Ki Nongïalam ka Shillong Sport Association (SSA) hapoh ka jingïalam jong u President u bah Banteidor ba la iadon lang ruh naduh Working President, Vice President, General Secretary, Joint Secretary bad Treasurer ki la leit ban ia kynduh ia u Myntri Rangbah ka jylla u Conrad K Sangma ha ophis treikam jongu ha Secretariat na ka bynta ban ïakren halor kiba bun ki kam ïalehkai sport khamtam eh na ka bynta ban tei pyndep ïa ka Gallery jongka madan ïalehkai First Ground kaba na ka liang ka Wahumkhrah.
Ha kane ka jingïakren la kyntu ruh ïa u Myntri Rangbah da ki nongïalam ka SSA ban phai khmat sha ka Association kaba long kawei na ki Association kaba la rim bad ba pynïaid ïa ki kam ïalehkai phutbol ha Polo naduh mynshwa haduh mynta kaba la pynlong ruh ïa ki League bapher bapher khamtam kum ka SPL kaba dei ka league kaba heh tam. Ki nongïalam ka SSA ki kyrpad ïa u Myntri Rangbah ban ïarap pisa ïa ka Association khnang ba kan dang lah ban pynbha shuh shuh ïa ki madan bad khamtam ban dang lah ban pynlong shuh shuh ïa ki kam ïalehkai phutbol hangne ha Shillong.
Haba ïakren bad u President ka SSA u bah Banteidor Lyngdoh u la ïathuh “ Ka jingïakren ka long kaba seisoh bha bad kyrmen ba kiei kiei kiba la ïakren bad pynpaw hakhmat jongu Myntri Rangbah kin long kam namar na ka liang u Myntri Rangbah ruh u pynpaw ïa ka jingkloi jongu ban phai khmat bad ïarap ïa ka SSA namar u ruh u kwah ba ka kam ïalehkai sport khamtam ka phutbol ka dei ban kiew bha ha kane ka jylla Meghalaya kumba long ha ki por ba mynshwa”.
Ki nongïalam ka SSA ki pynpaw ruh ïa ki jingeh ba ki ïakynduh ha ka liang ka pisa tyngka namar ka jingïoh bad ka jinglut kam ïahap satia kumta dei halor kane ka nongrim ki kyrpad ïa ka jingïarap na u Myntri Rangbah khnang ba kin ïoh ban pynïaid shakhmat ïa ki kam ïalehkai sport nalor ki kam ban pynbha bad pynitynnad ïa ki madan.
