Shillong, Jymmang 25 : Kat kum ka kaiphod ba nyngkong ba la ai da u Nongbishar ba la shongthait u Justice BP Katakey la lap ba ka sorkar jylla ka khlem pyntreikam ïa ki hukum jong ka ïing bishar Supreme Court (SC) bad National Green Tribunal (NGT) ha kaba ïadei bad ka kam tih bad khaïi beaiñ ïa u dewiong ha ka jylla Meghalaya.Halor kane ka ïing bishar HC ka la ai por ïa ka sorkar jylla ba ka dei ban pyntreikam lut ïa baroh ki jingbthah bad hukum jongka ïing bishar SC bad NGT hapoh saw taiew.
Ha ka kaiphod ba 41 sla ba la ai sha ka ïing bishar ha ka 23 tarik Jymmang 2022 la pynpaw lait noh tang ka jingpynbna ban pyntreikam ïa ka Mghalaya Mineral (Prevention fo Illegal Mining , Transportation and Storage) Rules 2022 kata ruh da ha ka 24 tarik u Lber 2022, ïa kiwei kiwei ki hukum bad jingbthah jongka ïing bishar SC bad NGT ym shym la pyntreikam satia.
Ki bor kiba la bthah ban pyntreikam ki long ka sorkar jylla, ka State bad Central Pollution Control Boards, ka North Eastern Space Application Centre bad Integrated Regional Office, ka Ministry of Environment , Forest and Climate Change.Hynrei ha ka kaiphod la pynpaw ba ym shym la don ba pyntreikam iwei ruh.
ïa kane ka kaiphod la aiti ha ka Bench ba pura jongka High Court ka jylla ha ka jingshong bishar ïa ka PIL ha ka 24 tarik mynta u bnai. ïa u Justice BP Katakey la thung da ka ïing bishar ban khlieh ïa ka committee ban bud dien la ka sorkar jylla ka pyntreikam ne em ïa ki hukum jongka SC bad NGT kynthup ïa ka jingdie ïa uto u dewiong ba la dep tih naduh mynshwa.
Ka ïing bishar ka la pynpaw ba ka long kaei kaei kaba sngewbabe ban tip ba ïa ki hukum jongka SC bad NGT la ïaid lait khlem jingpyntreikam da ka sorkar jylla bad halor kane ka ïing bishar ka la shim khia bha. Kumta halor kane ka ïing bishar naduh hynnin hi ka sngi ka la ai por ïa ka sorkar jylla ban pyntreikam lut ïa baroh ki hukum bad jingbthah ka ïing bishar SC bad NGT hapoh saw taiew.
Ka la bthah bad pynkupbor ïa u Justice Katakey ba un dang ïai bteng ban peitngor ïa kine ki jingpyntreikam naduh ka hukum jongka ïing bishar HC haduh ki jong ka SC bad NGT. U Justice Katakey un hap ruh ban wan sha kane ka nongbah na ka por sha ka por ha ka jinglut jingsep jongka sorkar bad la bthah ruh ban thung ïa u Member Secretary na ki MCS ban ïatreikam lang ryngkat bad u.
La bthah ba dei ban buh jingthoh ïa baroh ki jingpyntreikam kloi katba lah. La bthah ruh ïa ki bor sorkar ba ki dei ban wan mih hakhmat ka ïing bishar ha ka jingshong bishar biang ka ban long ha ka 21 tarik ban ïathuh haduh katno la pyntreikam ïa ki jingbthah bad hukum jong ki ïing bishar.
