Nongpoh, Jylliew 27: Ka FKJGP, Sohkhwai-Umdu Unit kala pynpaw ka jingsngewkhia kaba jur halor ka jingnang sniew jong u surok haka thaiñ Sohkhwai haduh 20 mer bad kynnoh ruh ka daw dei naka jingïaid ki trok kit rnga, dewiong bad ki dieng beaiñ.
Kum ban shu pynpaw hangne ba naka liang ka FKJGP North Khasi Hills District, dang shen kala leit ruh ban mih sha ophis u Asst. Executive Engineer ka tnad PWD Roads ban ïakren halor ka jingdonkam ban maramot noh ïa utei u surok PMGSY ba u kontraktor u dei ban shimkhia ban maramot kumba ki surok PMGSY ki dei ban don ka jingkhmih bad ka jingmaramot sa kumba 5 snem hadien bala dep shna pura.
Na ka liang ka seng kala lap ruh mynta ka sngi kawei ka trok kit rnga kaba la hap sha nala, harud surok ha katei ka thaiñ, bad ka jingïaid ki trok kit beaiñ naduh u rnga, dewiong bad dieng ka dang bteng lyngba utei u surok kynnoh ka FKJGP.
Na ka liang u Samla Shemphang Wahlang kum u President ka seng haka jingdonlang u Shroi Namsaw Organising Secretary, Sakharias Lyngdoh Rural Development Secretary, u la ong ba kum ka seng ka dap da ka jingsngewkhia halor ka jingbun ki kali beaiñ kiba ïaid lyngba utei u surok wat hadien ka jingpyrshah jong ka seng naka por shaka por bad kyrpad ruh ïaka tnad pulit ba ki dei ban shimkhia ban tehlakam ïaka jingïaid beaiñ jong ki kali kit dewiong, rnga bad dieng lyngba u surok Sohkhwai, ba utei u surok un nym jot bad sniew.
