Nongpoh, Jymmang 25: Ban khanglad na ki kam beain ne ki kam leh khlem akor pyrshah ïa ka wah Umiam ba hap ha u pud u sam ka Shnong Umiam, ka Executive Committee ka Dorbar Shnong Umiam ka la buh syndon shibun ki jingma kiba ïa dei bad ki kam hapoh ka wah Umiam.
Na ka liang ka Dorbar shnong Umiam ban pynneh pynsah ïa ki doh um bad ruh ban ïada ïa ka wah Umiam ka la buh shibun ki jingma kiba kynthup naduh ki briew kiba wieh dawai, kawang jar, teh jar, pyntuid jakhlia, khlong maw napoh ka wah Umiam.
Na ka liang ka Dorbar shnong ka la buh kine ki jingma, ka dei hadien ba la lap ba don bun ki riew shim kabu kiba la thmu ban wieh dawai, kawang jar, tong shyiap, khlong maw bad bret jaboh ruh sha ka wah Umiam, namar kane ka ktah ym tang ïa ka wah bad ka ktah ruh ïa ki paidbah kiba pyndonkam ïa katei ka wah na ka bynta ban sum ban sait.
Na ka liang ka Dorbar Shnong ka shah tang ïa kito kiba wan khwai tang ha ka por mynsngi bad la mana ban sahmiet hapoh ka wah ba bunsien ka don ka jingshim kabu ban kawang jar ne pynïap pathar ïa ki dohum hapoh katei ka wah.
Namar kata, na ka liang ka Dorbar shnong ka la buh ka jingma ba kim dei ban leh khlem akor ïa katei ka wah Umiam kiba hap hapoh u pud u sam jong ka shnoing bad ka shnong kan dang peitngor nagne shakhmat bad lada lap ïa kino kino kiba pynkhein ïa ki kyndon ba la buh da ka shnong ka shnong kan kem bad kan leh katkum ki kyndon ba la mana da ka shnong. Ïa kane ka kyrwoh la pynlait da u Rangbah Shnong, u Bah Stevin Kharkrang.
